Dempuèi 30 ans, lo bilingüisme francés-occitan es present dins las escòlas d’Avairon. D’efièch, en 1989 se dobrissiá a l’escòla Blanchard de Sant Africa la primièra escòla publica bilingua francés-occitan de l’acadèmia de Tolosa. Per festejar los 30 ans d’aquesta riquesa, un projècte educatiu foguèt bastit dins las 15 escòlas bilinguas d’Avairon en collaboracion amb l’artista plasticiana Nathalie Andrieu, creatritz d’estructuras e de personatges fargats de metal e de papièr: una òbra plastica se deviá passejar d’una escòla a l’autra e èsser completada per de produccions per tal de far partejar l’occitan e la cultura occitana dins totas las escòlas d’Avairon. Las produccions fachas pels escolans èran mai que mai ligadas a la localizacion e al territòri de cada escòla.
 
Lo projècte començèt doncas per l’escòla Blanchard de Sant Africa ont los escolans balhèron a l’òbra la forma d’un “arbre viatjaire” semblable a un arbre e a l’encòp a la crotz occitana dins sa forma e dins sas colors. Aqueste arbre partiguèt aprèp a la Vila ont los escolans de l’escòla Robert Fabre del Tricòt ajustèron de personatges que fan la ronda de Joan Petit. Son camin contunhèt fins a la Barraca del Fraisse en Segalar ont aquí un personatge nomenat “Segalon” foguèt ajustat a l’arbre. Arribèt aprèp a la Primauba. Los escolans de l’escòla Joan Bodon trabalhèron a l’entorn del conte famós de Joan Bodon, L’enfant polit, e ajustèron la barrica del conte. Lo periple d’aquel arbre contunhèt e arribèt a Milhau dins las doas escòlas bilinguas Eugène Selles e Joan Enric Fabre ont metèron a l’onor a costat de l’arbre viatjaire lo viaducte, l’arbre per insèctes, la gantariá, los ostalons de vinha… Mas la covid arribèt e l’arbre foguèt confinhat. Aprèp qualques meses de pausa forçada, tornèt prene son camin fins a Rodés ont la mandarèla (qu’es a l’encòp un pastís e una campana de la catedrala) foguèt mesa en valor pels escolans de las escòlas Cambon e Monteil. Puèi contunhèt sa passejada cap a las escòlas Anne Frank e Jean Monnet d’Espaliu. Los escolans del collègi fabriquèron dos contes que foguèron meses en votz e illustrats pels escolans de l’escòla. De mai, de muralhas foguèron ajustadas a l’arbre, simbòl de proteccion e remembrança del castèl de Calmont.
 
Enfin, la virada de l’arbre s’acabarà a l’escòla Jean Auzel de Marcilhac ont, de segur, los escolans ajustaràn encara de plan polidas produccions.
 
 
 
 
Lèa Edo
 
 



 

fffff		fffff
	Jornalet a l'escòla Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.  Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans. Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…