Era arrason d'aguesta nauta arreconeishença qu'ei eth "constant prètzhèt de recèrca, preservacion e promocion qu'a hèt der auviatge, des tradicions e dera lengua dera Val d'Aran, ara qu'a tradusit eth Nau Testament, e tanben pera sua trajectòria pastorau en Avescat d'Urgelh, restacada singularments ara Val d'Aran, d'a on ei estat archiprèire".
Diuendres 20 d'abriu se debanèc en Palai dera Generalitat de Catalonha er acte de liurament des guerdons dera Crotz de Sant Jòrdi. Un des premiadi qu'ei estat eth religiós aranés Mn. Jusèp Amiell.
En acte i a assistit ua nauta representacion des autoritats dera Val d'Aran, entestades peth Sindic d'Aran, Carlos Barrera, e d'auti membres deth Conselh Generau d'Aran e des Ajuntaments deth país. An tanplan presenciat er acte representants der Avescat d'Urgell e familhaus deth monsen de Garòs.
Eth Govèrn dera Generalitat de Catalonha qu'a autrejat era Crotz de Sant Jordi a 25 personalitats e 15 entitats qu'an destacat pes sòns merits e pes sòns servicis a Catalonha ena defensa dera sua identitat en encastre civic e culturau.
Era Crotz de Sant Jordi qu'ei ua des arreconeishences mès granes qu'autrege era Generalitat de Catalonha. Eth guerdon se creèc en 1981 entà distinguir es persones e es associacions que, pes sòns merits, agen prestat servicis destacadi a Catalonha. Tot ciutadan, o grop de ciutadans de Catalonha, que pòt demanar que s'autrege aguest guerdon a bèra persona o a bèra entitat.
Mn. Amiell qu'ei eth prumèr canonge dera Val d'Aran dempús deth sègle XVIII, quan eth país passèc der avescat de Comenge ar avescat d'Urgelh. Qu'ei tanben eth prumèr viatge qu'era Crotz de Sant Jòrdi s'autrege a un ciutadan aranés.
Josep Anton Castet / Ferriòl Macip
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari