La Cort Internacionala de Justícia a confirmat la senténcia a perpetuitat per l’èx-general serbobosnian Ratko Mladić per genocidi, crimes de guèrra e crimes contra l’umanitat pendent la guèrra de Bòsnia, entre 1992 e 1995. La senténcia foguèt prononciada en novembre de 2017 mas la defensa aviá presentat un recors d’apelacion.
 
Mladić, cap militar dels sèrbes de Bòsnia e Ercegovina pendent la guèrra, lo condemnèron per èsser estat lo responsable del chaple de Srebrenica en julhet de 1995. Aquela mortalha, ont moriguèron 8000 òmes e enfants bosnians musulmans, es considerada coma lo genocidi pus grèu d’Euròpa dempuèi la Segonda Guèrra Mondiala. Ratko Mladić es tanben acusat d’aver participat, en 1992, a una granda campanha de persecucions, deportacions, torturas e omicidis dins fòrça endreches de Bòsnia. En mai d’aquò, lo considerèron colpable de crimes de guèrra e contra l’umanitat pel sètge de Sarajevo, ont defuntèron mai d’11 000 civils.
 
Ratko Mladić despareguèt pendent qualques annadas, mas en 2011 lo trobèron e foguèt arrestat e jutjat. Actualament a 79 ans e es embarrat dins la preson de Scheveningen, a l’Aia.