La competicion al país se sarra de la fin amb una partida de jogar: la finala aqueste dimenge 20 de junh, a 3 oras del vèspre, a Tolosa, un rescontre qu’opausarà Carcassona e Lesinhan.

Carcassona celèbra a son biais la Copa d’Euròpa de fotbòl!
 
Avinhon arribava dissabte a Domèc amb lo vam de sa qualificacion arrancada a Limós lo dimenge passat. Carcassona èra dins lo dobte aprèp un mes de mai tristonet e la pèrda sus nafradura de dos jogaires clau: lo menaire de jòc Lucàs Albèrt e lo pilar Vavae Tuilagi. Per faire bona mesura, lo divendres de ser, lo capitani Bastian Escamillà anonciava qu’èra pas en mesura fisica de jogar la partida.
 
Los canaris marquèron dos ensages d’intrada, Avinhon respostèt amb una realizacion. A la pausa, los locals menavan 10-6.
 
Las causas se complicavan a la represa: a la 45a minuta, lo talonaire local preniá un carton roge. Lo dobertura blau e blanc Joffret escapava a la defensa carcassonesa per marcar un ensag, l’arrièr Arnaud ajustava una penalitat e Avinhon preniá l’avantatge 12-10. 57a minuta: carton jaune per un placatge naut. Pendent 10 minutas, Carcassona XIII anava jogar a 11 contra 13: un avantatge numeric pels provençals mas, contra tota logica, dins aquelas dètz minutas amb un tombat e un ensag transformat, los Canaris tornavan prene los davants al planchòt: 17-12. Doas realizacions suplementàrias concretizaràn la victòria carcassonesa, malgrat un ensag avinhonenc: 27-18.
 
 
Corrís, corrís lo Ferret!
 
Dimenge, fasiá encara mai caud al Molin per la partida entre Lesinhan e Dragonets. Los portaires d’aiga prenguèron una brava susada en avitalhant los jogaires long de la partida! La confrontacion foguèt equilibrada: 12-12 a la pausa. La decision se faguèt al mai fòrt d’un temps de dominacion catalana: sus sa linha, l’alièr local Valentin Ferret interceptèt una passa e, aprèp 100 mètres de corsa, anava puntar l’ensag. Los audencs prenián un avantatge que los catalans capitarián pas de remetre en question. Los Verd e Blanc validavan, sus la marca de 26-18, la bilheta per la finala audenca.
 
 
Superliga: los catalans caps de fila!
 
La competicion europèa es tornarmai pertocada per la Covid. Doas partidas de la novena jornada se poguèron pas jogar: Huddersfield-Wigan e Leeds-St Helens.
 
Los Dragons Catalans que venon ganhar a Leigh ne profièitan per prene la primièra plaça del classament. Foguèt pas simple cò dels darrièrs: los Centurions menavan 18-12 a la pausa, los Sang e Aur realizèron una bona entamenada del segond temps per faire lo trauc e resistir al retorn dels locals en fin de partida: victòria catalana 36-30.
 
Leeds deuriá venir a Perpinhan aqueste dissabte, se la Covid o vòl plan!
 
 
Championship: novèla victòria per Tolosa
 
En Championship, novèl viatge en Anglatèrra e novèla larga victòria, amb dètz ensages marcats: 22-0 a la pausa e 56-12 al final fàcia a Dewsbury.
 
 
Estats d’Origina: mandat de recèrca dels Bordèu
 
La polícia de l’estat de Queensland a lançat un avís de recèrca dels jogaires Maroons:
   
Precisa que se n’es apercebut un sol dins la jornada de dimècres 9: lo que marquèt l’ensag, mas a costat son 8 ensages d’encaissats per una desfaita bèla: 50-6 pels Blaus.
 
Revenge lo 27 de junh a Sydney: s’espèra una partida mai equilibrada e que los policièrs de Queensland tornen trapar lor formacion.
 
 
NRL: Las pantèras en ibernacion
 
Cò de las Làmias, Penrith se trapa menat 18-0 a la pausa; torna a egalitat, mas Shaun Jonhson ensaca lo tombat per una novèla desfaita dels caps de fila: 19-18!
 
La partida Titans-Roosters va al punt en aur e los Polets ganhan 35-34. Victòrias mai aisidas pels Lapinons fàcia a Newcastle (24-10), Canberra fàcia als Bròncos (38-16) . Parramatta passa 40 punts (40-12) als Tigres, e Manly ne passa cinquanta (50-18) als Vaquièrs, alara que Melbourne domina los neozelandeses: 42-16.
 
 
 
 
Alan Roch