Coma cada 17 de junh, era Val d’Aran que hestege ué era sua hèsta nacionau, enguan damb ua arreconeishença especiau entara gent anciana deth país e damb era commemoracion deth 30u anniversari dera arrecuperacion der autogovèrn. Eth 17 de junh de 1991 eth país occitan de cap de Garona qu’arrecuperèc es sues institucions dempús mès d’un sègle e miei d’inactivitat.
 
Es actes oficiaus que comencen damb era recepcion pera sindica de totes es autoritats e des convidadi ena sedença deth Conselh Generau. D’aquiu que començarà era tradicionau marcha de penons portadi pes representants de cada terçon enquiara glèisa de Mijaran a on s’amiarà a tèrme un acte institucionau.
 
En acte se projectarà eth vidèo institucionau dera Hèsta d’Aran 2021, se harà un aumenatge as victimes dera covid-19 e s’autrejarà eth prèmi Blancaflor 17 de junh as persones ancianes d’Aran. Fin finau s’issarà eth drapèu d’Aran, se sonarà er imne occitan e dançaràn es diuèrses còlhes de dances deth país.
 
 
Arreconeishença as ancians deth país
 
Eth Conselh Generau d’Aran qu’a decidit enguan d’autrejar eth prèmi Blancaflor 17 de junh as ancians deth país en arreconeishença deth sòn sacrifici, esfòrç e actitud en un temps de pandemia a on èren eth collectiu mès afectat.
 
 
Musèus gratuits
 
Agèr s’inaugurèc ena glèisa de Mijaran era exposicion “Conselh Generau d’Aran: 30 ans d’autogovèrn”. Ath delà, eth Musèu dera Val d’Aran (Vielha) e er ecomusèu Çò de Joanchiquet  (Vilamòs) seràn gratuits enquiath dia 20 de junh. Tanben se propòsen visites guidades gratuites tara Casa deth Senhor d’Arròs, qu’aculhís era sala de reünions plenàries deth Conselh Generau  e er Archiu Istoric Generau d’Aran.
 
 
Er autogovèrn d’Aran
 
Era data deth 17 de junh que mèrque era restauracion deth Conselh Generau, qu’ei er mès naut organ de govèrn aranés e, ath madeish temps, era principau administracion autonòma de tota Occitània. Justament per açò, era accion e era politica deth govèrn aranés son un exemple e un referent entà toti es occitans, que ven coma ua part deth sòn país ei estat capabla d’arribar a un govèrn autonòm damb tota era sua dignitat, en tot perméter era arrecuperacion dera lengua e dera cultura.
 
Era Val d’Aran qu’auec es sues institucions pròpries enquia 1834 quan sigueren suprimides pera reina espanhòla Isabèu II, qu’empleguèc era fòrça entà dissòlver es organismes tradicionaus aranesi. Un sègle mès tard, pendent era Dusau Republica Espanhòla, se sagèc de retornar as aranesi eth sòn govèrn autonòm tradicionau, mès era revòlta fascista deth generau Francisco Franco e era dictatura posteriora ac empedic. Calec demorar enquia 1991, quan eth govèrn catalanista dera Generalitat de Catalonha, pressionat peth movement ciutadan aranés des Terçons, restaurèc eth Conselh Generau e ne convoquèc es prumères eleccions entà tornar as aranesi eth sòn regim d’autogovèrn.




FM

 

Exposicion “30 ans d’autogovern” ena Glèisa de Santa Maria de Mijaran
Un recorrut ath long dera istòria deth govèrn d’Aran, en tot conéisher eth sòn naishement, era sua composicion e evolucion enquias nòsti dies. pic.twitter.com/agEC79DeKO

— Val d'Aran (@Val_dAran) June 15, 2021

 

Aguest dijaus ei era nòsta hèsta, era Hèsta d'Aran. Compartim eth programa der acte institucionau deth 17 de junh, dubèrt a tota era ciutadania. pic.twitter.com/mLwkaHpHXR

— Conselh Generau d'Aran (@conselharan) June 14, 2021