La decision del Conselh Constitucional francés a provocat la reaccion de divèrses elegits pendent las manifestacions de protèsta. Dins aquel sens, lo 16 de junh se bastiguèt en Bearn un collectiu que vòl empedir que totes aqueles prepauses sián desmembrats, forçar los elegits a complir las promessas d’ajuda e de sosten a las lengas autoctònas e velhar que la decision del Conselh constitucional non ajude pas a multiplicar las atacas contra l’occitan e contra las autras lengas que patisson lo meteis sòrt.
 
Atal, aperaquí una cinquantena de personas an creat lo dich “Collectiu bearnés per los drets de la lenga nosta” amb la tòca de trabalhar sus la defensa de la Lei Molac o la creacion d’una nòva lei per las lengas, la modificacion de la Constitucion francesa, la sensibilizacion de l’opinion publica e la pression suls elegits per que s’engatgen clarament en favor de l’immersion e de son desvolopament coma mejan eficaç de transmetre la lenga. Lo collectiu revendica que l’immersion siá practicada a l’encòp per los que l’an començada, es a dire Calandreta, mas tanben dins l’encastre del servici public d’educacion.
 
An convidat a los rescontrar lo deputat breton Paul Molac, autor de la lei de proteccion e promocion de las lengas minorizadas, que serà en Bearn los primièrs jorns de julhet. Molac vesitarà lo país gascon dins l’encastre de l’amassada d’elegits mas tanben rescontrarà las personas que desiraràn de l’ausir. Lo collectiu bearnés vei aquí la primièra manifestacion publica de son existéncia e çò que marcarà lo començament d’una tièra d’accions e d’iniciativas.