La dimenjada que ven, los 9 e 10 de febrièr, la vila de Montalban (Bas Carcin) aculhirà lo 12n Congrès del Partit Occitan (PÒC). L’amassada occitanista a, en aquela escasença, una significacion especiala, perque la formacion politica dobrís lo sieu congrès a las personas independentas qu’an aderit al Manifèst Occitanista. Aquel manifèst defend —sonque en francés— l’unitat d’accion de totes los occitanistas fàcia a las eleccions municipalas de l’an que ven.
 
Mai de 400 personas an aderit al manifèst, que visa d’organizar lo nombre maximal de candidaturas occitanistas sus un programa minimal, e mai se son articuladas en diferentas candidaturas de diferents partits. Per aquela rason, lo congrès del PÒC, qu’a promogut e sostengut lo manifèst, servirà a metre en comun aquela linha de trabalh e comptarà amb la preséncia d’aderents dels quatre ponches cardinals d’Occitània.
 
Dissabte, los signataris qu’o vòlgan rescontraràn de personas qu’ajan pas encara signat lo manifèst mas qu’ajan d’interès per ne saber mai. L’objectiu del PÒC e dels promotors dirèctes del document occitanista es de ne debatre al maxim lo sieu contengut per que lo màger nombre possible de personas s’i pòscan sentir representadas. L’amassada es gratuita e lo partit a mes totas los facilitats de transpòrt e de lotjament.
 
Al delà de s’organizar politicament a l’entorn del Manifèst Occitanista, lo congrès abordarà tanben las questions ordinàrias del PÒC. Dins aquel sens, las delegacions territorialas e las federacions del partit avisaràn de lor activitat politica e la direccion nacionala explicarà las directivas politicas pels tempses avenidors.