Aqueste dimenge, se clavava la sason d’Elèit 1 amb la finala del campionat a Tolosa (estadi Wallon). Los sostens dels dos clubs, Carcassona e Lesinhan, avián respondut presents.
 
Sus lor primièra ataca, Lesinhan jogava a la man en plaça de tustar al pè aprèp lo cinquet tengut e Valentin Ferret marcava l’ensag. Un còp de pè al ras de pelena de Matieu Khedimi permet a Alèxis Alberola de marcar l’ensag que Clamenç Herrero transforma.
 
Mas, sus una escapada solitària, Ciril Stacul torna balhar l’avantage als Verd e Blanc. Sus una combinason sus tap-penalitat, l’alièr Gambaro punta l’ensag qu’Herrero transforma. Abans la pausa, Lesinhan torna a nautor 12-12 sus un ensag de l’alièr Tòrt.
 
En debuta del segond temps, Lesinhan passa doas penalitats. En mièja ora, Carcassona traparà cap de solucion per capvirar la resulta. Lesinhan ganha 16-12 e s’entorna en Corbièras amb lo trofèu Max Rousié; Carcassona dintra decebut al pè de Ciutat en planhent d’aver pas mes un punt final positiu a una plan bona sason. Un brave gost d’inacabat!
 
 
La bona operacion dels Dragons
 
Los Dragons Catalans poguèron pas reçaupre Leeds aqueste dissabte, que los Rinocèros èran pertocats pel virus. An doncas pogut constatar, sens jogar e amb plaser, las desfaitas de lors concurrents dirèctes en cap de classament: dijòus, Warrington anèt ganhar 6-2 a St Helens, una partida ont se marquèt cap de punt dins lo segond temps! Divendres, Hull KR ganhava a Wigan 18-8.
 
Aquesta setmana serà marcada per la partida divendres a Warrington entre l’esquipa d’Anglatèrra e los Combined Nations All Stars, seleccion dels jogaires d’Antipòdes de Superliga, alara que los Dragons aniràn afrontar los Tigres de Castleford tre dijòus de ser.
 
 
NRL: lo segond Estats de las Originas aBrisbane
 
Las formacions avián recuperat totes los jogaires. Atal, los Roosters marcan dos ensages a Penrith, puèi las Pantèras se desrevelhan per véncer 38-12. Los Lapinons van passar un 46-0 a Brisbane e Melbourne es tròp fòrt pels Tigres: 66-16, e que dire de Manly que bat los Titans 56-24 alara qu’èra menat 24-8 a la pausa?
 
Aqueste dimenge 27, a Brisbane se tendrà la segonda confrontacion dels Estats d’Origina. Pels Bordèu de Queensland, s’agirà de faire doblidar lo 50-6 encaissat a la debuta de junh. L’emportar serà quicòm mai… que los Blaus de Nòva Galas del sud se vòlon autrejar lo trofèu de 2021 tre aquesta partida sens esperar lo rescontre de Sydney lo 14 de julh.
 
Divendres, se debanarà la partida femenina de la sason entre las 2 seleccions australianas: de seguir sus BeInSport.
 
 
 
 
Alan Roch