Lo conselh dels ministres de l’estat espanhòl aprovarà uèi la gràcia per 9 presonièrs politcs independentistas catalans. O anoncièt ièr lo primièr ministre Pedro Sánchez dins una conferéncia a l’opèra de Barcelona. Aital, lo president del govèrn espanhòl ensagèt de davançar la demanda del Conselh d’Euròpa que faguèt tanben ièr un debat sul rapòrt qu'exigïsd’Espanha la liberacion dels presonièrs politics catalans e lo retirament del mandat d’arrèst pels exiliats.

Lo discors de Pedro Sánchez se faguèt davant 300 personalitats e en l’abséncia dels representants del govèrn de la Generalitat que refusèron d’i participar. L’argument per graciar los presonièrs politics èra lo “retrobament”. “Sortissèm 9 personas de la preson, mas ne ganham de milions per la convivéncia”, çò diguèt.

“Cleméncia es pas justícia”

Per carrièras, la protèsta èra fòrta. De centenats de personas èran recampadas davant lo teatre jol lèma “Cleméncia es pas justícia”. Las divèrsas associacions e partits que cridava a la manifestacion insistissián sus l’idèa que la solucion es l’amnestia pels mai de 3000 perseguits a causa del referendum del 1r d’octòbre.

Per l’amnestia

Dins aquel sens, las associacions Òmnium Cultural e Amnistia i Llibertat portavan, tanben ièr, mai de 200 000 signaturas al Congrès dels Deputats espanhòl. De soslinhar que la cambra parlamentària espanhòla refusèt que se tenguèsse un debat sus l’amnestia.

Debat al Conselh d’Euròpa

E mentre que Pedro Sánchez parlava a Barcelona, a Brussèlas lo Comitat dels Dreches Umans del Conselh d’Euròpa debatiá a prepaus del rapòrt que demanda a Espanha la mesa en libertat dels presonièrs politics catalans e lo retirament dels mandats d’arrèst europèus pels exiliats.

Coma o aviam avançat fa qualques jorns susJornalet, las conclusions d’aquel debat son netas e claras. Mas dins lo debat de ièr, los dos principals partits espanhòls, PSÒE e PP, portèron d’emendaments per amendrir lo ton de las criticas contra Espanha e fan pression per que s’apròve pas lo rapòrt. De badas: lo rapòrt es adoptat.

Pere Aragonès: “La gràcia es pas una solucion”

De son latz, lo president de la Generalitat de Catalonha, Pere Aragonès, assegurèt que per el la gràcia “es pas brica una solucion a una repression qu’afècta de desenats e desenats de responsables publics e tanben de ciutadans”. Segon Aragonès, la repression contra l’independentisme catalan “va delà los nòu presonièrs e presonièras politics” que son encarcerats “per aver exercit lo mandat dels ciutadans” dins lo referendum del 1r d’octòbre de 2017.

La drecha espanholista contra la gràcia

L’espanholisme mai dur tanben manifèsta contra la gràcia, mas per de rasons completament opausadas als independentistas catalans. Considèran que liberar los elegits catalans es un “còp de gràcia contra la legalitat”.

Desfeta estrepitosa d’Espanya: el Consell d’Europa exigeix, per 70 vots a favor i 28 en contra, la llibertat dels presos politics catalans, el retorn dels exiliats i la fi de la repressió https://t.co/f3LEVYEvjQ

— Vicent Partal (@vpartal) June 21, 2021

‼ Militant d'@Arran_jovent fa boikot a l'acte de @sanchezcastejon. No volem els seus indults, amnistia per totes les represaliades! pic.twitter.com/45sYLVXgr0

— Arran (@Arran_jovent) June 21, 2021

Unes 300 persones, segons @GUBBarcelona, a l’entorn del Liceu per protestar contra l’acte de Pedro Sánchez. S’hi reuneixen manifestants convocats per @assemblea , @CDRCatOficial i @cupnacional. Crits als primers convidats que arriben al Gran Teatre @324catpic.twitter.com/raAHFYtn0u

— Rubén Cabús (@rubencabus) June 21, 2021