Los Dragons son anats ganhar aqueste dijòus de ser cò dels Tigres de Castleford, pel primièr còp dempuèi 2012. Amb una esquipa remanejada: coma Sam Tomkins e Tom Davies jogavan per Anglatèrra e Alrix Da Costa èra assucat tre la debuta, los Sang e Aur faguèron lo necessari per ganhar 16-6.
 
De mai, veson Wigan pèrdre tornarmai: 14-6 a Wakefield e Saint Helens es privat de partida a Hull KR pertocat pel virus. Una formacion d’Hull qu’a ja anonciat que seriá pas a Perpinhan lo 8 de julh!
 
Aqueste dijòus 1r, los catalans jogaràn cò dels Gigants d’Huddersfield.
 
 
Los angleses comptan las estelas
 
Dins l’encastre de la preparacion per la Copa del Mond, Anglatèrra rescontrava divendres de ser a Warrington los All Stars, una seleccion de jogaires de Superliga dels Antipòdes. Seleccion de mal montar, que los clubs volguèron pas liberar los melhors jogaires.Los dos catalans, Tomkins e Davies, faguèron lo desplaçament en veitura per evitar la promiscuitat dels avions! Sam Tomkins foguèt designat coma capitani dels angleses.
 
E suspresa: la victòria escai als All Stars: 26-24. De trabalh en vista pel seleccionaire anglés!
 
 
Tolosa dins un estadi de Superliga
 
Aqueste dimenge, lo Tolosa Olimpic tornava trapar las pelenas. Es sus l’estadi de Wakefield que los occitans rescontravan Sheffield. Las aglas deguèron plegar las alas fàcia a la superioritat mondina: 54-6.
 
 
Austràlia: los Blaus son los mai fòrts
 
Divendres, calguèt esperar la darrièra minuta per veire la formacion de Queensland ganhar sus una penalitat la partida dels Estats de las Originas femenina fàcia a la Nòva Galas del Sud: 8-6.
 
Dimenge, la segonda confrontacion de l’an dels Estats d’Origina se debanava a Brisbane. Queensland faguèt illusion en debuta de partida, mas los Blaus, aprèp una intercepcion e una corsa de 85 mètres de Latran Mitchell (25a minuta), faguèron la diferéncia e foguèron pas jamai en dificultat: victòria 26-0. La tresena partida del 14 de julh se jogarà per l’onor, mas ongan Queensland es un ton en dejós.
 
 
 
 
Alan Roch