Un trentenat de personas participèron dissabte passat, 19 de junh, a Sant Seren (Limarga) a la remesa dels prèmis del concors d'escritura Pèire Brayac. Dins la serada, los primièrs 3 de cada categoria —elementari, collègi, licèu e adultes (en individual e collectiu)— legiguèron lor tèxt davant l'auditòri e recebèron un diplòma e un libre.
 
Lo concors l’organiza l’associacion Aquí l’Òc, es dobèrt a totes e s’adreiça mai que mai als escolans dels departaments d’Òlt e de Corresa. Un total de 31 personas an participat a aquela primièra edicion, en majoritat d’escolans d’aqueles endreches mas tanben de tota Occitània.
 
Après corregir las còpias, la jurada compausada de 7 autors e ensenhaires a establit un classament per categoria.
 
La còla d’Aquí l’Òc vos dona rendètz-vos tre setembre per una edicion novèla del concors d'escritura Pèire Brayac.
 
Aquí l’Òc es una associacion que son sèti es a Sant Seren (Limarga) e que sa tòca es de promòure e desvolopar la lenga e la cultura occitanas dins lo nòrd de Carcin. Tanben sosten l’escòla Calandreta l’Esquiròl. Vila de l’escrivan Pèire Brayac, Sant Seren sèrva de nombroses locutors d’occitan qu’an popat la lenga al brèç, e mai aculhís de corses d’occitan per adultes en mai de las classas d’occitan dins doas escòlas publicas, un collègi e un licèu.
 
Podètz vesitar lo sit Internet d’Aquí l’Òc e tanben lo grop de Facebook fòrça actiu.