Un vintenat de joves faguèron arrestar un TGV dissabte passat quand partissiá de Marselha en direccion de Niça, e ensagèron d’i intrar abans de fugir pr’amor de l’arribada de la polícia.

Lo TGV veniá de partir de la gara de Marselha, pauc après 14h, quand lo menaire foguèt obligat d’estancar lo tren en veire d’entòrchas sus la via. “Aquelas entòrchas amb flama roja son d’aisinas de seguretat que s’emplegan normalament per senhalar un gròs problèma e, en aquel cas, los menaires an per consigna de s’arrestar”, çò expliquèt a l’AFP una pòrtavotz de la direccion regionala de l’SNCF en Provença.
 
La polícia foguèt alertada sul pic e los assalhidors fugiguèron en tot córrer; lo tren aviá las pòrtas tancadas. Nòu joves originaris de l’onzen arredondiment de Marselha foguèron interpelats e meses en garda a vista a la Seguretat Departamentala.
 
“Sèm tornats a l’epòca de l’atac de las diligéncias, sèm en plen Far West... avèm ja agut a Marselha d’atacs de trens de mèrças dins los Quartièrs Nòrd, e d’agressions regularas contra los contrarotlaires, e ara avèm passat una òsca suplementària”, çò declarèt a l’AFP David-Olivier Reverdy, secretari zonal adjonch del sindicat de policièrs Alliance.