Fa justament un an, raportàvem dins Jornalet, que mai d’una centena de personas èran estats espionats amb un logicial per telefòns intelligents que solament los govèrns dels estats podián aquerir. Ara, Microsoft ven de desvelar que los espionats son mai de 100 000 e a publicat 50 000 numèros de telefòn piratats.
 
Un consòrci de sètze mèdias de pertot dich The Forbidden Stories a accedit a la lista de victimas d’aquel espionatge. Assabenta que las victimas son environ 180 jornalistas de païses coma Índia, Mexic, Ongria, Marròc e l’estat francés; e tanben d’activistas pels dreches umans, d’universitaris, d’entrepreneires, d’avocats, de mètges, de dirigents sindicals, de diplomatas, de politicians e qualques caps d’estat. Demest los espionats se tròban lo president de la Generalitat de Catalonha en exili, Carles Puigdemont, e plan d’autres independentistas catalans.
 
Entre los numèros de telefòn localizats per Microsoft, mai de 15 000 son en Mexic e son de jornalistas, de politicians e de dirigents sindicals e critics envèrs lo govèrn. Tanben i a un grand nombre de victimas de l’Orient Pròche dont Qatar, los Emirats Arabis, Bahrayn e Iemèn. S’es trobat fòrça numèros de jornalistas d’Índia, coma lo de Siddarth Varadarajan, fondador del jornal The Wire, un dels mèdias qu’a publicat l’informacion. Se mençona tanben lo telefòn de Szabolcs Panyi, jornalista d’investigacion del jornal ongrés Direkt36, qu’a tanben assabentat de la nòva.
 
Segon The Guardian, lo govèrn de Viktor Orbán en Ongria a emplegat l’esplech per espionar d’avocats, d’opausants politics e de jornalistas. De son latz, lo govèrn ongrés desmentís d’aver practicat cap mena d’espionatge. Pasmens, l’analisi del telefòn de Panyi a demostrat qu’aguèt lo telefòn contrarotlat per aquel logicial pendent sèt meses en 2019.
 
Las analisis d’Amnestia Internacionala an trobat tanben d’evidéncias que s’installèt lo logicial dins los telefòns mobils de la femna e de la filha del jornalista Jamal Khashuqji (sovent transcrich Khashoggi), assassinat dins lo consolat saudita d’Istambol en octòbre de 2018.
 

Macron espionat per Marròc
 
Entre los telefòns espionats n’i aviá un que lo president francés, Emmanuel Macron, emplega regularament dempuèi 2017, e tanben los numèros de l’èx-primièr ministre Édouard Philippe e de catòrze ministres del govèrn francés. Segon d’informacions publicadas per Le Monde, aqueles numèros de telefòn foguèron triats per un servici de seguretat de l’estat marroquin, utilizaire del logicial d’espionatge.


Installat amb un apèl vidèo de WhatsApp
 
Lo logicial s’introdutz dins lo telefòn mobil per mejan d’un apèl vidèo de WhatsApp que la victima i deu pas quitament respondre. Un còp que lo logicial es installat, los espions an accès a tot lo contengut del telefonet e pòdon quitament activar a distància lo microfòn e la camèra, çò que permet un espionatge considerable.
 
Aquel esplech d’espionatge es desvolopat per la societat israeliana NSO Group, qu’assegura que solament lo vendon als govèrns dels estats amb la tòca exclusiva d’espionar suspèctes de crimes o delictes grèus o de terrorisme.


 

There are certain industries, certain sectors, from which there is no protection. We don’t allow a commercial market in nuclear weapons. If you want to protect yourself you have to change the game, and the way we do that is by ending this trade.https://t.co/JfUiEJ8ipx

— Edward Snowden (@Snowden) July 19, 2021

 

Amnesty has exposed #Pegasus snooping! This is the reason why the regime in India hates Amnesty and has driven them away. Here I explain to DW News why Amnesty was forced to halt its operations in India. @Aakar__Patelhttps://t.co/IyYcxFnDXH via @YouTube

— Ashok Swain (@ashoswai) July 19, 2021

 

El president @KRLS Puigdemont: 'Cada llicència de #Pegasus per a poder punxar un telèfon mòbil costa 300.000 euros. Això significa que, pel cap baix, el govern espanyol s'ha gastat més de 250 MEUR a espiar líders polítics i de la societat civil catalana.' pic.twitter.com/VWpYyb3j3n

— El Gat Negre  (@elgatnegre007) July 20, 2020

 

I que faran amb el tema 'Pegasus'? pic.twitter.com/hUC4zsEYJd

— Angel BCN (@MikeCATbcn) July 16, 2021

#Pegasus Hall of Shame! pic.twitter.com/m0DEA0TfHw

— Ashok Swain (@ashoswai) July 18, 2021