Lo primièr ministre ongrés, Viktor Orbán, a anonciat que son govèrn organizariá un referendum sus la lei que criminaliza la populacion LGBTI e que, jos l’escampa de combatre la pedofilia, interditz los parladisses sus l’omosexualitat e la transidentitat dins los centres educatius.
 
Aquela lei a indignat fòrça representants politics d’autres estats de l’Union Europèa e la Comission Europèa a dobèrt una procedura de sancion per aver mancat als dreches fondamentals e als tractats de l’Union Europèa. Orbán a anonciat lo referendum dins un vidèo en dirècte sus son compte Facebook.
 
Dins sa compareissença, lo cap del govèrn ongrés a parlat de “proteccion dels menors”, perque el a totjorn presentat aquela lei LGBTI-fòba coma un combat contra la pedofilia.
 
La lei s’aprovèt gaireben a l’unanimitat, solament un deputat votèt contra. Interditz las conferéncias e los parladisses sus l’omosexualitat e la transidentitat dins los centres educatius, e enebís l’emission de contenguts audiovisuals de tèmas LGBTI a la television pels mens de 18 ans. L’an passat, Ongria aprovèt ja una lei qu’interdisiá l’adopcion als parelhs del meteis sèxe, e metèt fin a la reconeissença de las personas transgenres.
 
De remembrar que la lei russa de 2013 qu’enebiguèt la “propaganda LGBTI” foguèt seguida d’un aument de la persecucion e de la violéncia contra las personas del grop social.