Setmana de polemica a Carcassona ont los XV reprochèron amb marrida fe als XIII lor non-victòria fàcia a Pau en rason de l’estat del terren, aprèp la partida ASC-Whitehaven. Dissabte, jos las ramadas, la pelena de Domèc èra trempe amb unas piscinas long de las linhas de tòca, mas d’un còp d’uèlh e d’un pè pausat pel sòl, l’arbitre diguèt que se podiá jogar lo recontre ASC-Vilanòva. E lèu foguèt una partida de rugbi-fanga a flor e a mesura que l’aiga tornava montar a la susfàcia a cada placatge. A aquel jòc, las valors de las 2 esquipas s’equilibravan e Vilanòva podiá daissar liure cors a sa valentisa per contrar los campions. Lo salut dels jaune e negre venguèt de sos joves: ensag del talonaire Jonatan Som, ensag, penalitat e designacion coma òme de la partida pel mesclanha Alexís Alberolà e victòria de l’ASCarcassona: 14-10. Per çò qu’es de l’estat de la pelena de Domèc…
 
En tèrra provençala, Limós manquèt son entama e menat 24-4 a la pausa perdèt fin finala 38-20 e vegèt s’envolar lo darrièr pecic de sòmi d’una possibla qualificacion.
 
Dimenge, Tolosa ganhèt logicament a Lescura qu’opausèt una brava resisténcia: 24-10.
 
A St-Estève, se teniá lo grand truc entre los dos primièrs, e demai lo derby catalan: mas Pià confirmèt la qualitat bèla de sa formacion e ganhèt sus la marca pro ben espantanta de 34-4!
 
Per la dimenjada qu’arriba, plaça a las Copas Lord-Derby pels seniòrs e Nitard pels juniòrs. Dins aquela categoria, un afrontament de primièra s’anóncia dissbate de vèspre a Carcassona (estadi Benausse) entre l’ASC e los Dragonets.
 
Al programa de la Copa de França dimenge: los afrontaments entre esquipas d’Elita 1: Dragonets-Limós a St-Esteve, Tolosa-Lescura als Minimes alara qu’Avinhon anirà desfisar lo pichon Pocet de nacionala 1 Realmont e que l’ASCarcassona defendrà son trofèu cò de la formacion d’Elita 2: los Lops de Vilafranca de Roergue.
 
Aquesta primièra dimenjada de febrièr marcava tanben la represa de la Super-Liga: lo campion Leeds ganhèt aisidament fàcia al Hull FC 30-6 e Wigan passèt 42 punts a Salfòrd.
 
Brava suspresa a St-Helens amb la victòria d’Huddersfield 40 a 4. Los Dracs jogavan contra Hull KR. Laurenç Fraissinós aviá fisat los pòstes de mesclanha a Tomas Bòsc e de dobertura a Lon Pryce e titularizat lo jove Bosquet coma pilar. Los Dracs prenguèron los davants per menar 22-2 a al pausa, coneguèron un trauc de dètz minutas dins lo segond temps ont encaissèron tres ensags mas l’emportèron fin finala 32-24. Dissabte, reçaupràn a Brutús (18h), l’esquipa de Salfòrd que coneis una situacion financièra malaisida, çò que limita sas ambicions esportivas. Mas lo rugbi es pas brica una sciéncia exacta!
 
 
 
 
Alan Roch