Los deputats Yannick Kerlogot e Christophe Euzet an remés lor rapòrt al primèr ministre de França, Jean Castex. Raportàvem ièr dins Jornalet que dins aquel rapòrt una contribucion del cercaire Gwenole Larvol metiá en question l’afirmacion del ministre de l’educacion Jean-Michel Blanquer segon la quala “l’ensenhament amb paritat orària seriá mai benefic als escolans que l’immersion”.  Uèi, assabentam de la reaccion del deputat breton Paul Molac, fargaire de la lei de promocion de las lengas autoctònas de l’estat francés, dichas regionalas, que lo Conselh Constitucional a censurat.

A l’endeman de la presentacion del rapòrt dels deputats Yannick Kerlogot e Christophe Euzet, remés al primièr ministre francés, Jean Castex, Paul Molac ditz que compren pas que los deputats frenen sus aquesta question e que considèren qu’es impossibla, çò rapòrta France 3.
 
“Lo Senat es pr’aquò ben estat a l’iniciativa de l’article sus l’ensenhament per immersion. A ieu m’inquieta que lo rapòrt convide los rets d’ensenhament a modificar lor pedagogia e lors convencions: eles demandan sonque de poder far perdurar lors metòdes que foncionen e donen de resultats, e mai s’aquò agrada pas al ministre Blanquer.”
 
En mai d’aquò, Molac assegura que Blanquer deu “èsser satisfach que las proposicions d’aquel rapòrt anen dins son sens amb la creacion d’un «conselh nacional de l’ensenhament de las lengas regionalas», jos son autoritat, per tal que la nauta administracion aja l’ample sus aquela question.”
 
De son latz, Diwan denóncia una volontat de “nos metre dins lo quadre”, çò rapòrta Ouest France.
 
 
Una presentacion estranha de la lenga nòstra
 
Apondam qu’aquel rapòrt separa l'occitan, d’un caire, del gascon, del provençal, del niçard e del lengadocian dins la presentacion dels efectius d'escolans dins lo primari,  e d'autre caire del provençal e del niçard dins la presentacion dels efectius dins lo segondari. Per l’ensenhament immersiu, ça que la, la lenga nòstra es considerada del biais unitari legal.
 
 


 

Les propositions contenues dans le rapport rendu hier au Premier Ministre et au Ministre de l'Education par mes collègues Y. Kerlogot et C. Euzet ne me rassurent pas. Elles m'inquiètent. Gageons que le PM entende enfin les craintes des associations... #languesregionalespic.twitter.com/7bYp35RpoF

— Paul Molac (@Paul_Molac) July 22, 2021

 

Langue bretonne. Diwan dénonce « une volonté de nous mettre dans le cadre » https://t.co/mEXEhtOs7g

— philippon (@philipponkemper) July 22, 2021