Lo país dai Palhons es un espaci contrastat. De zònai artisanalai e industrialai coma dins lo plan dal Palhon de Còntes (de La Poncha a Còntes), de vilatges quilhats coma Còntes, Berra de las Alps, Casternòu... e de zònai de vilas. Mas i es ancara un molon de terrai agricòlai d’importança en particular dins lo domèni de la produccion d’òli, una dai riquessai famóai en Gavotina maritima.
 
Existe sempre una produccion d’òli professionala mas tantben una produccion amatora que sòrte dai deficis (molins d’òli) coma aquel dai Escalhons sus la comuna de Còntes, fins a aquel comunal de L’Escarea en passar per de deficis privats (tiera completa).
 
Despí la baissa dal nombre d’agricultors, a creissut lo nombre de terrens a l’abandon e lo degalhament dal païsatge tant dins lis espacis en plan –quora es ren concurrenciat per l’urbanizacion– coma per lai faissai: muralhai encalaas, lavanhai de terra, barranhai.
 
Per fin d’entretenir lai valaas, la Cooperativa per l’utilisacion dal Material Agricòl (CUMA) oleïcòla de lai valaas dai Palhons e l’associacion “Agricultura e environament” (Agriculture et environnement en francés) prepàuon ai particulars de material mas tanben de servicis de personai qualificaas. 
 
Creaa en 1970 la CUMA oleïcòla dai Palhons mete a la disposicion dai sius sòcis d’equipaments e de material sovent car per l’usança d’una soleta campanha. ”A flor e mesura avem aquist de novelai maquinai per respòndre ai esperançai dai sòcis per facilitar la remesa en estat de terrens abandonats” ditz son president Joan-Mari Giauffret.
 
Es una ajuá notabla per lai personai atjaas que pòlon plus entretenir li siu campanhai tant coma per lai personai que vivon aicí sensa mestrejar lo poatge e l’entreten dai auliviers coma dai arbres en general. Es mes a disposicion lo material necessari per poler trabalhar la siu oliviá tant d’ivèrn coma en periòde de secaressa e d’interdiccion de cremar.
 
En complement d’aquò, l’associacion “Agricultura e environament” qu’a 4 salariats e qu’es presidiá per Doménegue Céleschi se prepaua d’intervenir tota l’annaa per l’entreten dai espacis vèrds e la prevencion dai incendis. Vòl incitar li proprietaris e li novèls estatjants dai zònai periürbanai dai valaas a netiar li siu terrens e bòscs ambé de tarifai atractivai. Cal notar qu’es devengut una obligacion d’eissartar ai entorns dai maions e vilas, subretot dins aquel airal, que la pression fonciera creisse d’en pertot e arna lai còlai. Es parierament tot un patrimòni agricòle que se transmete dificilament, coma la lenga occitana. L’associacion sosten per aquò lis escambis per que lo monde fague mai atencion al siu environament. Lai personai interessaas per li servicis de la CUMA oleïcòla dai Palhons ò de l’associacion Agricultura e environament pòlon contactar lo Burèl dai afars agricòles a Còntes al +33 (0)4 93 79 36 13 o  sus www.pays-des-paillons.fr.
 
Lo modèl cooperatiu e associatiu, un bèl modèl per trabalhar ensèm a salvar lai cauai. De que donar d’inspiracion al país per l’occitan gavòt.
 
 
 
 
Clara de Las Aias