Aqueste dijòus 22 de julh, dins un comunicat comun, las federacions australiana e neozelandesa an anonciat que mandarián pas ongan lors formacions nacionalas a las Copas del Mond previstas en Anglatèrra a la tardor.
 
Demandan als organizaires de considerar un repòrt a l’an venent. Per ara, aquestes an just dit que prenián nòta d’aquela decision mas que lor cal causir entre organizar la competicion sens las doas mai fòrtas nacions o faire un trauc dins lo budget amb un remandament d’un an.
 
De mai, que van decidir ara las autras formacions dels Antipòdes que, per ara, an assabentat de lor engatjament mas que sos jogaires van subir de pressions dels clubs NRL per venir pas en Euròpa?
 
 
Superliga: los Dragons jògan amb los nèrvis dels sostens
 
St Helens e Castleford pertocats pel Covid aprèp la finala de la Cup an pas pogut jogar las partidas previstas St Helens-Hull KR e Dragons-Castleford. Per las meteissas rasons, pas de partida entre Warrington e Leigh.
 
Se’n profeitèt per disputar lo rescontre en retard entre catalans e Hull KR. L’entraïnaire McNamara aviá dit qu’èra pas question de mancar un còp de mai la dintrada dins la partida. Mas al cap de 5 minutas, lo mièg Abdull començava de faire de misèrias als catalans amb un ensag transformat. Anava asagar de sas candelas la defensa catalana long de la partida. Witley i respondiá mercé a una intercepcion. Los Dragons anavan alternar moments fòrts e decas defensivas. Atal, Sam Tomkins se jogava dels defensors advèrses dins un pichon perimètre per marcar, mas agantava pas una palma de volada e vesiá un tres-quarts d’Hull li passar jol nas cap a l’ensag. A la pausa, los angleses menavan 26-12. A la represa, Witley tornava marcar, mas Abdull puntava un novèl ensag que transforma pas. Kasiano lança Goudemand a l’ensag, puèi Yaha marca sus son ala un ensag que Morgue transforma del canton. Lo mièg de dobertura passa la penalitat de la victòria 32-30 a 7 minutas de la fin! E l’entraïnaire catalan de tornar dire que valdriá mai jogar sul meteis ritme long de las 80 minutas!
 
Dijòus, Huddersfield faguèt plegar Hull-FC: 40-26. Dins los rescontres que se joguèron divendres de ser, victòrias logicas de Leeds fàcia a Salford (38-16) e de Wigan sus Wakefield: 25-12.
 
Novèla partida a Brutus pels Dragons tre dijòus de ser amb la recepcion de Wakefield.
 
 
NRL: en marcha cap a las pelhòfas
 
Los caps de fila contunhan de ganhar: Melbourne va batre los Vaquièrs 20-16, Penrith domina Brisbane 18-12 e los Lapinons passan un 60-22 als neozelandeses.
 
Parramatta, los Polets e Manly son tanben sul camin de las pelhòfas. Dragons de Sant Jòrdi, Canberra, Cronulla e Newcastle son a la luta per las darrièras doas plaças qualificativas.
 
 
Una bona lectura tretzista: Lo Diari
 
Lo XIII es en bona plaça dins los articles del recent numèro de la revista bimestrala de l’IEO de la region qu’a pres lo nom d’Occitània, Lo Diari; un numèro consacrat a l’espòrt. Guilhèm Gratiolet s’entreten amb Joan-Francés Albèrt (director esportiu de Carcassona XIII) e amb Cassandre Campanella (internacionala, Bordèu), e fa una analisi del libre de Frederic Vouland, La partida clandestina.
 
 
 
 
Alan Roch