Lo rei Ricard III èra jos un parcatge. La despuèlha del monarca Ricard III l’an localizada jos un parcatge de veituras a Leicester (Anglatèrra). De cercaires britanics an confirmat qu’an trobat los tròces d’una esqueleta, que comprenon un cran fracturat e una colomna vertebrala, e que revenon al monarca Ricard III, lo darrièr rei anglés que moriguèt en batalha.

La trobalha a permés de resòlver un mistèri que fasiá 500 ans que durava. Lo rei Ricard III, representat per William Shakespeare coma un tiran despietadós qu’assassinèt dos princes dins la Tor de Londres, regnèt entre 1483 e 1485, e foguèt lo darrièr de la dinastia dels Plantagenèstes abans que la corona passèsse a la familha Tudor. Segon çò que se sabiá, lo rei Ricard III moriguèt quand luchava contra son successor, Enric Tudor, a la batalha de Bosworth Field, al centre d’Anglatèrra, en 1485.
 
Coma avançament de la primièra, l’Universitat de Leicester e la cadena Channel 4 an publicat una primièra fotografia amb las rèstas dels òsses del rei.
 
L’imatge mòstra la forma del cran e la de l’esqueleta. Aquela part del cadavre es mai que mai importanta perque se sabiá que lo rei patiguèt de lesions a la part posteriora del cap, efièch de la batalha ont perdèt la vida. Per aquò, los investigators gardèron sustot las rèstas del cran per i trobar los traumatismes qu’auriá patit.
 
Après d’espròvas d’ADN de sos descendents e qualques meses d’analisis de l’esqueleta, que foguèt trobada ara fa un an pendent lo tractment de rèstas medievalas, la Doctora Jo Appleby, professora de bioarqueologia umana a l’Escòla Universitària d’Arqueologia e Istòria Anciana, a explicat: “Lo cran se trobava en de bonas condicions, e mai s’èra dins un estat fragil, e nos a donat d’informacions detalhadas sus l’individú que reveniá”.
 
D’un autre costat, l’esqueleta mòstra tanben de pròvas que lo rei Ricard III aviá l’escoliòsi quand moriguèt.
 
L’especialista a explicat que pendent las recèrcas per determinar se lo cadavre èra de Ricard III, se bastiguèt tanben un perfil biologic de sas caracteristicas.