Dins la nuèch, tranquillament, pr’amor qu’èra a dormir, Joe Michael Hill “Dusty Hill” (lo puèg poscós, de son escais) s’anava pas tornar revelhar. Un dels barbuts mai famoses de l’istòria del rock-blues nos daissava a 72 ans. Aviá daissada la virada de ZZ Top per anar recuperar de problèmas a l’anca dins son ostal de Houston. Tornem sus la carrièra d’un grand nom del rock-blues.
 
 
Texan mai que tot
 
Es lo 19 de mai de 1949 que nasquèt Joe Michael Hill a Dallas, en Tèxas, dins lo quartièr de Lakewood East Texas. Faguèt sos estudis al Woodrow Wilson High School. Es aquí qu’encontrèt Franck Beard, bateire amb lo qual partegèt l’empont dins las còlas de blues The Warlocks e The Cellar Dwellers. Franck Beard, lo sol que pòrta pas la barba quitament se son nom d’ostal vòl dire “barba” en anglés, i presentèt William “Billy” Frederick Gibbons. Los tres formèron en 1969 una còla que se disiá “That Little Ol’ Band from Texas” qu’anava venir “ZZ Top”.
 
 
Dos barbuts e un bateire
 
L’origina del nom del grop demòra escur... D’unes diràn qu’es degut a una pèca de picatge (se volián dire “22 Top” mas la persona que mandèt la maqueta s’enganèt entre la chifra 2 e la letra Z), d’autres bruches de corredor dison qu’aurián causit aquel nom per èsser los darrièrs dins los bacs de disques e doncas escapar pas a l’uèlh de las gents. E lo mistèri serà pas jamai revelat (lo grop diguèt encara dins los ans 2000 que lo nom era sortit de la cervesa “Corona Light”; l’L semblavan a una Z).
 
Ça que la, es lo 20 de junh de 1969 que Billy Gibbons, guitarrista sortit de faire la primièra partida de Jimi Hendrix que li aviá fach present d’una Fender de color ròsa, fasiá amb Franck Beard a la batariá e Dusty Hill a la bassa lo primier concèrt de ZZ Top.
 
Dos ans puèi, en 1971, espelissiá ZZ Top First Album, primièr disc d’una còla qu’anava demorar constanta mai de 50 ans.
 
 
Un line up que cambièt pas jamai
 
Dins l’istòria del rock gaireben tota las còlas an agut, a un moment donat, un cambiament de musician: un musician que s’alassa e que se’n va, un autre que defunta... I a sonque doas còlas que sa composicion non cambièt pas jamai: son U2 e ZZ Top. Del 20 de junh de 1969, fins al 28 de julhet de 2021 ont defuntèt lo Dusty Hill, ZZ Top en 52 ans cambièt pas jamai de line up. Cambiaràn pas jamai lor paréisser tanpauc. S’òm ditz “ZZ Top” a qualqu’un, l’imatge que li ven còp sec es la de dos barbuts amb de clucas de solelh. E la barba del mond de ZZ Top es sagrada e una signatura... Per pròva, la marca Gillette prepausèt en 1984 un million de dolars a Gibbons e Hill per se copar la barba. Causa que los dos refusèron de faire.
 
 
Sobrietat e celebritat
 
Podèm pas dire de ZZ Top qu’es un grop de virtuoses... Ça que la, l’art del “riff biaissut de Gibbons” e lo costat “ritmic que bolega pas de Beard e Hill” son famoses. A mai, la còla aguèt totjorn “lo nas” al nivèl de la musica. Per pròva, lor virada disco e elèctro al moment de l’album Eliminator, lo biais qu’avián de causir las represas (de “Jailhouse Rock” fins a “Viva Las Vegas”) e tanben lo de compausar. En 1973, la còla fasiá espelir lo famós tube “La Grange”, inspirat per un bordèl a la termièra de Mexic e Tèxas del temps qu’èran joves... De notar que lo riff aisit e la bassa chanuda fan d’aquel títol un tube que totòm coneis e que l’introduccion en picking a la batariá servís sovent d’exercici per intrar al conservatòri de batariá.
 
 
Una còla davancièra
 
ZZ Top es tanben la primièra còla que se prepausèt a la NASA per faire un concèrt dins l’espaci (causa que se faguèt pas jamai). Participan tanben al filme Back to the Future III ont jògan de musica. Es l’escasença de veire Gibbons e Hills en “bessons de la musica” (los dos an la meteissa gestuala sus l’empont). Es vertat que sèm luènh aicí de musicians subretecnics... Ça que la, l’eficacitat de ZZ Top ne fa una còla essenciala dins l’istòria del rock’ n’ roll, e la desapareguda de Dusty Hill daissa tant los afogats de musica coma los de rock orfanèls.
 
Es vertat qu’en tèrmes de politica, èran de rednecks sortits de Tèxas e prò-NRA, ça que la en tèrmes de musica, un fum de grops son estats inspirats per ZZ Top.
Alavetz, la còla contunharà benlèu puèi, mas sens Dusty Hill serà pas parièr. Per pròva, èra complementari de Billy Gibbons. Los dos asseguran lo cant segon los tròces e la votz de Hill, pro nauta, en menant un contrast amb la votz cavernosa de Billy Gibbons (se pòt sentir especialament sus un dels tubes de la còla Tush).
 
 
Puta de camarda
 
La pèrda de Dusty Hill es un desastre tant pel rock e pel blues... coma per la musica en general. E aprèp 52 ans de “manjar de quitran amassa”, se pòt sentir l’esmoguda de Billy Gibbons e Franck Beard dins lo communicat oficial del grop.
 
Tot çò que vos pòdi conselhar es: se coneissètz pas, cal pausar l’aurelha sus la discografia de ZZ Top, veire per conéisser mièlhs la còla, fintar l’excellent documentari de Sam Dunn, That Little Ol’ Band From Texas.
 
RIP, Sénher Hill.

 
 
 
 
Cedric Rosseu