Niça, Vichèi e lo far de Cordoan son intrats oficialament dins la lista dels sits del patrimòni mondial de l’UNÈSCO. Dimars 27 de julhet, s’amassèron en China los representants dels 21 païses membres del comitat e reconeguèron la “valor universala excepcionala” de la capitala niçarda e de son eiretatge arquitectural, païsatgièr e urbanistic. D’aquel temps, reconeissián tanben un monument que se tròba a l’autre extrèm d’Occitània, davant l’estuari de Gironda: lo far de Cordoan dich lo Rei dels Fars o lo Far dels Reis. Lo 24 de julhet, avián ja inscrich al patrimòni mondial la candidatura d’onze grandas vilas d’aiga d’Euròpa, dont Vichèi, dins lo nòrd d’Occitània.
 
 
Vila de torisme aristocrata
 
A Niça, dempuèi lo sègle XVIII, de familhas artistocraticas, mai que mai britanicas, se passejan sul Camin dels Angleses. Es lo clima doç e la beutat de son emplaçament al pè dels Alps qu’an rendut la vila atractiva a sirs e lords. En 1823 se desvolopèt un plan urbanistic perplan aprofechar tot aquel potencial. Es atal que la vila es intrada dins la lista de l’UNÈSCO amb sos palaisses, sos palmièrs, sas glèisas russas , sas ostalariás, son art dèco, sos casinòs...
 
 
Lo Rei dels Fars
 
A l’extrèm occidental d’Occitània, situat a sèt quilomètres en mar sul platèl de Cordoan, a l’embocadora de l’estuari de Gironda, se tròba lo far de Cordoan. Bastit entre 1584 a 1611, es lo far pus ancian del país encara en foncionament.
 
Creat per l’engenhaire Louis de Foix, lo far es un cap d’òbra de la senhalizacion maritima e plan representatiu de l’istòria arquitecturala dels fars.
 
 
La mai granda vila d’aiga del país
 
Dins lo nòrd del país, la vila de Vichèi èra ja, dins lo territòri estatal, la mai prestigiosa e la mai celèbra de las vilas d’aiga: dempuèi l’epòca romana s’emplega sas aigas per lors vertuts terapeuticas, e l’emperaire Napoleon III transformèt prigondament son arquitectura segon los principis d’Haussmann. Ara, entre onze grandas vilas d’aiga d’Euròpa, Vichèi obten a l’UNÈSCO una reconeissença especiala.
 
 
Delà los tres sits occitans, l’organizacion a anonciat l’inscripcion de las 36 candidaturas culturalas e naturalas nòvas d’Asia, d’Africa, de l’America latina e d’Euròpa, que correspondián a las candidaturas de 2020 e 2021. En consequéncia, la lista compren ara 1149 sits que desenant seràn protegits per aquela institucion especializada de l’ÒNU.
 
Ça que la, qualques sits son estats eliminats d’aquela lista, coma la vila de Liverpool (Anglatèrra), la val d’Èlba e lo santuari de l’orix arabi (Oman).