Fidel Castro reapareguèt dimenge passat per votar en un collègi electoral a las eleccions del Parlament cuban, e conversèt amb la premsa e amb divèrsas personas pendent una ora. S’agís de la primièra aparicion publica del mandatari dempuèi l’an 2010. Dins las eleccions passadas, Castro aviá votat dempuèi en cò sieu, après venir malaut en 2006 e cedir dos ans puèi lo poder al sieu fraire, Raúl Castro.

L’èx-president, dins sos 86 ans, apareguèt fòrça vielhit. Castro parlèt dels esfòrces per reformar l’economia, de l’integracion latinoamericana e del president veneçolan Hugo Chávez.
 
“Las gents son vertadièrament revolucionàrias, se son sacrificadas de verai. O nos cal pas demostrar, l’istòria o farà. Cinquanta ans de blocatge e se son pas rendudas”, çò manifestèt.
 
Los cubans anèron votar per elegir una lista de 612 deputats per l’Assemblada Nacionala. Lo president Raúl Castro e d’autres caps apareguèron a la television en emetent los lors vòtes e en soslinhant l’importància de las eleccions.