Una enquista oficiala independenta considèra que l’administracion de l’estat e lo govèrn de Malta son los responsables de l’assassinat de la jornalista Daphne Caruana-Galizia per aver creat una cultura de l’impunitat, çò rapòrta The Guardian. Segon lo document, de 437 paginas, l’administracion de l’estat defautèt a l’ora de “reconéisser los risques immediats e reals que patissiá la vida de la jornalista, e defautèt tanplan a l’ora de far quicòm de rasonable per n’evitar l’assassinat. The Times of Malta publica en PDF lo rapòrt de l’enquista.
 
L’èx-primièr ministre Joseph Muscat demissionèt en decembre del 2019 après la detencion de l’òme d’afars Yorgen Fenech. Fenech impliquèt dins lo murtre lo cap del gabinet de Muscat, Keith Schembri, amb qui partejava d’interèsses dins de societats qu’avián lor sèti en Panamà o Dubai.
 
 
Una jornalista qu’aviá desvelat de cases de corrupcion
 
Doas setmanas abans d’èsser assassinada, Daphne Caruana-Galizia aviá dich a la polícia que crenhiá per sa seguretat.
 
Aviá 53 ans e èra fòrça coneguda per la publicacion d’informacions que destapavan de famoses cases de corrupcion del país. O fasiá per mejan de son blòg Running Commentary. Aquí denoncièt que lo ministre de l’energia Konrad Mizzi èra mençonat dins los Papièrs de Panamà e, pus tard, raportèt quitament que lo primièr ministre del país e sa femna beneficiavan de l’offshore Egrant.
 
Segon una recèrca de Reuters, Fenech èra proprietari d’una societat secreta sonada 17Black que finançava d’autras societats secretas de Panamà, proprietats de Schembri e de Konrad Mizzi, ministre del torisme.