Gaireben 20 ans après los atentats contra lo World Trade Center qu’èra estada seguida de l’invasion d’Afganistan per las tropas estatsunidencas, los talibans (etimologicament “los estudiants” en religion) son tot prèp de prene, tornarmai, la direccion del país, çò rapòrta Le Monde.
 
Lo govèrn elegit d’Ashraf Ghani sembla pas capable de reversar la situacion, essent que son influéncia se limita a Kabol e a son ròdol.
 
 
Lo despart de l’armada estatsunidenca
 
Al tèrme de dos decennis de preséncia de l’armada US, lo bilanç es tras que fragil e controversiat: 5000 civils tuats dins d’operacions de còps azardosas, 70 000 soldats afgans de l’armada regulara e prèp de 2500 soldats estasunidencs aucits e, per completar lo tablèu, mai de 2000 miliards de dolars despensats pels govèrns que se son succedits a l’Ostal Blanc. Aquestes ponches an acabat de convéncer lo novèl president Biden de quitar definitivament Afganistan ongan, annada simbolica puèi qu’aquò fa 20 ans que dos avions s’espotiguèron dins las torres bessonas. Preissats pels talibans, los estatsunidencs an negociat en posicion de feblesa. Lo despart, que se deviá far primièr al mes de setembre, es fin finala estat avançat al 4 de julhet, data de la fèsta d’independéncia dels Estats Units, un biais d’amagar l’umiliacion.
 
 
Una victòria indefugibla?
 
 
E mai lo govèrn estatsunidenc aja promés una ajuda militara aeriana, i a pas cap de comparason possibla entre una armada talibana aguerrida, professionalizada, prèsta, e l’armada governamentala lassa, empedegada dins d’afars de corrupcion, en manca de material e desmoralizada. Per ara, cal soslinhar que cap de vila es pas tombada oficialament mas tot indica qu’aquò tardarà pas, que la pression es de mai en mai fòrta dins totas las regions perifericas, ont los talibans tenon lo campèstre e son sostenguts per l’etnia majoritària pashto. Los combats an ja començat a l’entorn de Mazar-e Sharif (nòrd), Qala-e Naw, Herat (oèst), Ghazni (èst), e Kandahar (sud, vila brèç del movement taliban e d’un de lor cap istoric lo mollà Omar, tuat en 2013). 
 
 
Un avenir plan malsegur
 
Malgrat que lo discors oficial dels caps talibans se presente coma rassegurant, los faches fan crénher un retorn endarrièr brutal. Las evolucions qu’a conegut la societat afgana en vint ans poirián lèu èsser avalidas completament. Ja d’escòlas per las dròllas son estadas cremadas, d’ensenhaires arrestats e detenguts (Ali Abdi), d’actors assassinats (Nazar Mohammad). La situacion de las femnas e de las minoritats religiosas e etnicas ven fòrça inquietanta e poiriá menar una partida de la populacion a un dilèma crudèl: patir tornarmai una òrra dictatura religiosa o fugir lor país.



TH

 

An updated #Afghanistan map; the consolidation of Taliban-controlled areas is visible. pic.twitter.com/gJsv8LzmEZ

— DRM Journal (@remilitari) August 1, 2021

 

Thousands in Afghanistan are lining up to get passports and visas, as the Taliban advances and the U.S. pulls out.

There are up to 10,000 applications daily, including people who worked as translators for U.S. forces: “We have no choice but to leave, like we did in the past.” pic.twitter.com/Fw5YlrtxwE

— AJ+ (@ajplus) July 28, 2021