Una cadena umana dins tres vilas bretonas demandarà, dissabte que ven, la reconversion de France 3 Bretagne en un canal bilingüe. Las entitats vòlon que la cadena prenga en compte tota la Bretanha completa, en i comprenent lo departament del Léger Atlantic.

Divèrsas associacions e partits politics bretons an apelat a manifestar simultanèament dissabte que ven, lo 9 de febrièr, dins tres vilas desparièras per reclamar la creacion d’un canal de television bilingüe en breton e en francés. Las organizacions que convòcan la mobilizacion —que son Ai’ta, Kevre Breizh, 44=Breizh e Bretagne Réunie—, an tanben lo sosten del partit autonomista de l’Union Democratica Bretona e vòlon far una cadena umana als sètis que la television publica regionala France 3 ten a Brèst, Roazhon e Gwened.
 
La tòca es d’aprofechar lo procès de restructuracion que se debana a France 3 per convertir France 3 Bretagne en una “vertadièra cadena de television publica bilingüa” que siá “l’expression de l’ensems de la societat bretona dins los domenis social, cultural, economic e politic”. De mai, las entitats demandan que la nòva France 3 Bretagne emeta “dins los cinc departaments bretons”, es a dire, dins los quatre que se tròban dins la region oficiala de Bretanha e en Léger Atlantic, istoricament breton mas a l’ora d’ara integrat dins la region dels Païses de Léger.
 
L’idèa a lo sosten del Conselh Regional de Bretanha, qu’en decembre passat aprovèt una mocion que s’engatjava a contactar lo govèrn francés e la direccion de France Télévisions (consòrci public que possedís France 3) per “estudiar la creacion d’una plataforma audiovisuala bretona digitala”.
 
L’escomesa precedenta per una television bilingüa, TV Breizh, foguèt d’emetre de programas en breton pendent una bona part del decenni passat. Ça que la, lo projècte aguèt pas lo succès qu’esperavan los sieus impulsors, e las emissions en breton partiguèron pauc a cha pauc.
 
 
Una lenga qu’a besonh de sosten
 
Un estudi presentat en 2009 concluguèt que la lenga es parlada per un pauc mens de 200 000 personas en Bretanha. L’autor del rapòrt, Fañch Broudic, calculèt alavetz qu’al ritme de pèrda de parlants que patissiá la lenga, en l’an 2017 ne demorarián solament 122 000. Coma donada positiva, Broudic soslinhava que dins la franja de populacion d’entre 15 e 19 ans, la coneissença de la lenga èra passada d’1% a 4% dins lo darrièr decenni, sustot mercés a la creissença de l’escòla bilingüa.
 
 
 
 
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.