L’esportiva bielorussa Krystsina Siargeeuna Tsimanouskaia s’es refugiada dins l’ambaissada polonesa a Tòquio après denonciar que la volián menar a Minsk contra sa volontat. Ara se tròba jos la proteccion de la polícia japonesa e del Naut Comissariat de las Nacions Unidas pels Refugiats (NACNUR). Polonha, qu’aculhís un grand nombre de dissidents bielorusses, li a concedit un visat umanitari.
 
Segon un comunicat del Comitat Internacional Olimpic (CIO), Tsimanouskaia demandèt ajuda a la polícia quand se trobava a l’aeropòrt de Tòquio-Haneda per evitar d’èsser repatriada per fòrça après aver criticat l’esquipa tecnica de Bielorussia suls rets socials. Aquò aguèt luòc dimenge passat, un jorn abans que l’esportiva deguèsse participar a l’espròva dels 200 mètres.
 
Abans la temptativa de raubatòri, Tsimanouskaia aviá dich als jornalistas de Reuters que l’avián fòrabandida de l’esquipa bielorussa a causa de comentaris sus Instagram ont l’esportiva criticava la negligéncia dels entraïnaires. Dins aquela entrevista, ela demandèt l’ajuda del CIO perque se sentiá en perilh d’èsser menada dins son país contra sa volontat.
 
De son latz, lo portavotz del CIO, Mark Adams, assegura qu’a parlat amb Tsimanouskaia e qu'aquesta “se pòrta plan e se sent salva”. Segon Adams, “se i a cap de signe de criminalitat, o cal examinar, mas es un afar de la polícia. Ara, lo CIO a reclamat al comitat olimpic bielorús un rapòrt suls faches, e a remembrat que l’an passat s’èra ja entreprés d’accions contra aquela delegacion.
 
 

Exclusive: Belarusian athlete Krystsina Tsimanouskaya said she was taken to the airport against her wishes to board a flight back home after she publicly complained about national coaches at the Tokyo #Olympics. @gabrielletf reports https://t.co/jICTnn3L4ppic.twitter.com/656Yc9nS93

— Reuters (@Reuters) August 1, 2021