Ongan, es a Tolon, del 26 al 29 d’agost, que lo Partit Occitan e Òc per Provença organizan la 26a Universitat d’Estiu de Regions e Pòbles Solidaris (R&PS), la federacion dels partits autonomistas e federalistas de França, amb lo sosten de l’Aliança Liura Europèa. Los trabalhs se debanaràn a l’Espaci Comèdia, al Teatre de la Mediterranèa. Lo tèma principal dels trabalhs serà: ”Santat, economia, fonsièr… fàcia a las crisis sistemicas: cambiar la Constitucion e causir lo federalisme”.
 
 
Un programa plan ric…
 
Se parlarà de Provença a la sesilha de dobertura lo dijòus 26 de matin per considerar de regions umanas e autonòmas: Arvèi Guerrera tornarà sus la campanha: Ni Sud, ni mai PACA mai Provença; Danís Carèl parlarà d’agroecologia; Andrieu Neiton contarà l’istòria e los enjòcs del teatre occitan; un representant de la SCOP-Ti farà lo punt sus lor cooperativa.
 
Lo dijòus de vèspre, serà question de las autonomias possiblas dins una França federala: un jurista farà lo punt sus la Lei Molac; lo novèl conselhièr regional de l’UDB, Nil Caoussin, desvoloparà son idèa d’estatut de resident regional; se parlarà tanben de la situacion e de l’endevenidor dels territòris d’otramar… …
 
Novèla sesilha lo divendres de matin: «Despassar l’Euròpa dels estats», amb d’exemples (Flandra, Escòcia, Irlanda, illas Åland,…) abans la paraula balhada de vèspre a de candidats per la presidenciala de 2022. Una taulejada bèla e plan meritada clavarà la jornada.
 
Lo dissabte 28 de matin, lo grop parlamentari Libertats e Territòris farà lo punt sus son accion .
 

R&PS prepara 2022
 
Lo dissabte de vèspre e lo dimenge de matin, l’acamp se transformarà en congrès de Regions e Pòbles Solidaris ont los aderents de las formacions federadas debatràn de las eleccions de 2022 (lo dissabte de vèspre) e tendràn l’acamp estatutari lo dimenge de matin.
 
 
 
 
Alan Roch
 

 

---

Totas las entresenhas sul debanament, las tarifas, l’albergament son de trapar sul sit web de l’eveniment