La polícia norvegiana es pauc coneguda en Occitània, delà las aventuras de l’inspector alcolic Harry Hole dins los romans de Jo Nesbö. En Norvègia, per contra, la polícia es pas sonque logicament coneguda, mas lor compte de Twitter (@oslopolitiops) es un dels mai populars del país: amb ochanta mila seguidors, una chifra mai que considerabla per Twitter en Norvègia.
 
Mas la popularitat qu’a la polícia suls rets socials se deu mai que mai a l’engèni de sas fiuladas. Diluns passat, son compte recebèt lo prèmi a la melhora fiulada d’ongan, fins a uèi, dins Social Media Days (nòta de premsa de la polícia).
 
Aquela fiulada disiá: “Nos an informat d’una alteracion nocturna amb de crits de femnas. Sus lo luòc dels faches, avèm remarcat que i a una fèsta d’infirmièras. Lor avèm demandat de quitar las installacions”. La fiulada recebèt una refiulada massissa pel sens de l’umor. E es pas lo sol cas.
 
Per exemple, lo 26 de decembre, la polícia norvegiana fiulèt: “Un veïcul arrestat e suspècte d’èsser menat dins un estat d’embriaguesa. S’agissiá d’un menaire grèc que circulava pel primièr còp per las estradas ivernalas norvegianas.” Qualques jorns abans, la polícia fiulèt tanben l’eveniment d’una pana de veitura dins l’autoestrada: “Lo menaire s’es mes de genolhs sus una flaçada e a començat de pregar. Es pas segur que pòsca ajudar”.