L’esportiva bielorussa Krystsina Siargeeuna Tsimanouskaia es ara en Polonha ont ten un visat umanitari. Al començament d’agost demandèt l’ajuda de la polícia de l’aeropòrt de Tòquio per evitar d’èsser repatriada per fòrça après aver criticat sos entraïnaires dins l’encastre dels Jòcs Olimpics. Ara, de Varsòvia estant, a explicat als mèdias sa version de çò que se passèt.
 
Per Tsimanouskaia, tornar en Bielorussia “implicava la preson o l'espital psiquiatric”. Quand se trobava dins la veitura que la menava a l’aeropòrt de Tòquio, sa grandmaire li telefonèt. “Se te plai, demòra a Tòquio o vai dins quin autre país que siá d’Euròpa, mas rintres pas en Bielorussia, es pas segur”, çò li diguèt la grand. Es per aquela rason, que tanlèu davalar de la veitura demandèt l’ajuda de la polícia de l’aeropòrt e, sul pic, obtenguèt la proteccion de la polícia japonesa e del Naut Comissariat de las Nacions Unidas pels Refugiats (NACNUR). Ela demandèt l’ajuda al Comitat Internacional Olimpic, mas foguèt Polonha que li ofriguèt lo visat.
 
“Aimi Bielorussia, es ma pàtria, ai pas jamai agut cap de desir de l’abandonar. Jamai non aviái pensat que me trapariái en aquesta situacion”, çò expliquèt l’esportiva. “Aviái quitament pensat d’entamenar un petit projècte de fitness”, çò precisèt; un projècte que son marit tanben s’i èra engatjat. Ara, el es tanplan partit en Polonha e li an concedit lo meteis visat.
 
Tsimanouskaia es pas una militanta politica. “Soi totjorn estada alonhada de la politica. Ai pas signat de letras ni soi anat a cap de protèsta. Ai pas jamai dich res contra lo govèrn bielorús. Soi una esportiva que compren pas res a la politica”, çò insistiguèt. Alavetz, perqué tot aquel rambalh? Perqué la voldrián embarrar pel simple fach de criticar de foncionaris del comitat olimpic de Bielorussia? Benlèu la responsa es lo director d’aquel comitat: lo filh del president Viktor Lukashenko.
 
Enfin, l’esportiva prepausèt son ajuda a d’autres esportius que se trobèsson en una situacion similara: “Se senton quina pression que siá, soi lèsta per parlar amb eles e, se cal, los ajudar a quitar lo país”.
 
 

Fearing for her safety, Belarusian sprinter Krystsina Tsimanouskaya refused to board the flight and was eventually granted asylum in Poland. Following the ordeal, she said

"I want to tell all Belarusians not to be afraid and, if they're under pressure, speak out". pic.twitter.com/nTjU2iuFfK

— Amnesty International Aotearoa NZ (@AmnestyNZ) August 9, 2021

 

The Belarusian Olympic sprinter in exile, Krystsina Tsimanouskaya, says she wants to send a message of encouragement to people repressed by the government of her country's President Alexander Lukashenko. #Olympicshttps://t.co/7jNzrQusX4

— NHK WORLD News (@NHKWORLD_News) August 9, 2021