Los govèrns d’Alemanha, d’Àustria, de Belgica, de Grècia, dels Païses Basses e de Danemarc creson que cal manténer las expulsions dels ciutadans afgans devèrs lor país e mai los talibans sian a mand de tornar prene las comandas del país. Dins una letra mandada a la Comission Europèa, los ministres de l’Interior d’aqueles sièis govèrns considèran qu’arrestar los retorns mandariá un senhal erronèu, e jutjan probable qu’aquò encoratge maites ciutadans afgans a quitar lor país. A mai, la letra tanben critica una demanda que la faguèt lo Ministèri dels Refugiats d’Afganistan l’8 de julhet, que demandava la suspension pendent tres meses dels retorns a causa de l’escalada de las tensions amb los talibans.
 
Segon los sièis ministres, cap d’acòrdi amb Afganistan prevei pas de suspendre las repatriacions e l’estat afgan a l’obligacion internacionala d’acceptar quin afgan que siá tornat al país. Los sièis demandan tanben a la Comission Europèa que refortisca las convèrsas amb lo govèrn d’Afganistan per pacharr los retorns dins los meses avenidors.
 
Qualques pòrtavoses de la Comission Europèa an confirmat dins una conferéncia de premsa qu’alestisson una responsa a aquela letra. Pasmens, an assegurat que Brussèlas a pas de competéncias per decidir s’un país es segur o non per i remandar de ciutadans.