Los mai afogats del fotbòl auràn seguit aquesta setmana la partença de Leo Messi del FC Barcelona (Barça) e son arribada a l’esquipa del París-Saint Germain (PSG). E mai Messi volguèsse pas quitar lo Barça, lo jogaire s’i es vist obligat a causa d’un problèma burocratic: la règla de l’UÈFA dicha del “fair play financièr” establís qu’un club pòt pas despensar mai d’argent qu’encaissa. Per tant, se lo Barça manteniá Messi en son sen, e mai amb son salari reduch de mitat coma èra previst, auriá mancat a aquela nòrma e degut pagar una multa insuportabla pel club. La liga espanhòla se mostrèt plan inflexibla sus aquel afar.
 
Ara, un grop de sòcis del Barça a preparat una denóncia contra lo PSG davant la Comission Europèa e mai una procedura davant las justícias civila e administrativa francesas per que s’empache l’incorporacion de Messi al PSG. Segon l’avocat Juan Branco, los ràtios del PSG en tèrmes de “fair play financièr” son piègers que los del Barça: “Dins la sason 2019-2020, lo rapòrt entre salaris e recèptas de l’esquipa parisenca foguèt del 99% del temps que lo del Barcelona èra del 54%”, çò diguèt.
 
Per Branco, “lo problèma es qu’en França, per far un servici a Qatar qu’organiza la Copa del Mond de 2022, lo comitat encargat del contraròtle financièr a decidit de non aplicar pas de sancions economicas fins a 2023”. Per l’avocat, lo Barça deu complir una règla de l’UÈFA mentre que lo PSG pòt far çò que voldrà fins a 2023, e per aquela rason aquò s’es denonciat a la Comission Europèa. La procedura pòt demorar una annada.