Lo govèrn de Veneçuèla e lo principal partit de l’oposicion an pachat d’entamenar un procès de dialòg e negociacion per resòlver la crisi politica que la viu lo país après que lo cap dels opausaires Juan Guaidó s’autoproclamèt president e puèi ensagèt un còp d’estat militar. Lo pache se signèt divendres de ser dins lo Musèu d’Antropologia de la ciutat de Mexic jos la mediacion de Norvègia, país qu’a totjorn promogut las negociacions.
 
L’acòrdi compta sèt ponches dont lo fuèlh de rota devèrs las eleccions regionalas que, per ara, son programadas per novembre e que devon èsser lo primièr desbocament de la scena politica. Un autre ponch soslinhat es la levada de las sancions internacionalas.
 
Concretament, las sèt prioritats son: de dreches politics per totes; de garentidas electoralas per totes e la programacion d’eleccions observablas; la levada de las sancions, la convivéncia politica e sociala, lo renonciament a la violéncia e de compensacions per las victimas d’aquesta; la proteccion de l’economia nacionala e de mesuras de proteccion sociala del pòble veneçolan. L’acòrdi considèra de garentidas d’aplicacion, de seguiment e de verificacion.
 
En mai del sosten norvegian, las negociacions auràn desenant un grop d’acompanhament format de representants dels Païses Basses e de Russia. Se prevei l’incorporacion de delegats d’autres païses coma Alemanha, Turquia, los Estats Units o Canadà.