Los observaires internacionals son tornats al vilatge de Takwara après de menaças de mòrt. La polícia a arrestat l’assassin pagat, tanben a enquestat sus los fazendeiros responsables e sus los indians menaçats. La Fondacion Nacionala de l’Indian (FUNAI) es amb los indigènas e la Fòrça Nacionala complirà la vigilància establida per los protegir.

Lo nòstre collaborador, Dídac Cerezo, e la rèsta dels volontaris de la comission internacionala son tornats al vilatge de Takwara. I son estats dempuèi dimars passat e uèi partisson. I anèron sul pic, tre que i aguèt de nòvas menaças de mòrt imminentas contra los caps kaiowás.
 
Los menaçats foguèron Ládio Veron de Takwara, Dionísio de Guaiviry (filh d’un cap assassinat) e Faridi Mariano Lima (de Laranjeira Nhanderu), que dimècres passat subrevisquèt a un assag d’assassinat.
 
En Brasil i a de grands entrepreneires agricòlas que lor dison los fazendeiros, e certans fazendeiros engatjan d’esbirros armats qu’an nom los jagunços. Lo fazendeiro Jacinto Honório da Silva Filho aviá pagat lo jagunço Moacir per fin de tuar los menaçats. Moacir s’amagava armat près del vilatge, segon çò que nos raportèt la comission internacionala.
 
Après de telefonadas d’avocats a la polícia, ièr de matin, venguèt la veitura de la Fondacion Nacionala de l’Indian (FUNAI) amb una persona de fisança dels kaiowás. La Polícia Federala de Naviraí anèt liurar a l’administrador del fazendeiro una convocacion per l’obligar de prestar declaracion a la Polícia Federala.
 
La polícia arrestèt Moacir, lo jagunço contractat per assassinar los caps kaiowás. S’es fach una enquèsta sus l’assassin pagat, sus lo fazendeiro e sus los caps indians menaçats. Moacir demorarà mes en garda fins a la fin de la recèrca.
 
Segon Ládio Veron, lo delegat diguèt amb veeméncia a Moacir: “ara lo Mond entièr es a m’observar, e aquò solament s’apren a tu”, en una allusion clara a las exigéncias d’una accion mai efectiva de la part de la Polícia Federala.
 
Es aital qu’avèm remarcat que gràcias a la divulgacion nacionala e internacionala de las menaças e corrupcions, s’es exercida una pression reala suls organismes publics brasilièrs. En mai d’aquò, la Polícia Federala de Naviraí a afirmat qu’a partir d’uèi, la Fòrça Nacionala complirà la vigilància establida pel Ministèri Public Federal de tres torns per jorn, un d’eles nocturne.
 
Los indigènas guaranís kaiowás demòran dins l’estat brasilièr del Mato Grosso do Sul, al bòrd de Paraguai. Ailà, pendent la dictatura militara de Brasil, los fazendeiros desplacèron de milièrs d’indigènas de lor país. Quand la dictatura tombèt, en 1985, lo retorn comencèt, mas los indigènas rescontrèron la resisténcia armada dels quites fazendeiros e dels jagunços que contractavan. La violéncia fa ja d’ans que dura, e qualques organizacions internacionalas se son mobilizadas per ajudar los guaranís kaiowás.