Dijòus al ser, sus sa pelena, St-Helens se fasiá susprendre per Castlefòrd (desfaita: 10-20).
 
Una escasença, aqueste divendres, pels Dragons catalans de confirmar la primièra plaça al classament amb la recepcion d’Hull-Fc que presentava una formacion rejovenida amb lo filh de l’entrainaire catalan a la mesclanha, que passèt 4 còps de pè. Los sang e aur metèron temps per prene lo pas sus l’adversari que menava a la pausa 14-10 aprèp un ensag marcat sus intercepcion e un autre en inferioritat numerica.
 
La situacion se clarificava dins lo darrièr quart d’ora amb un tombat de Maloney, un ensag de Sam Tomkins sus una fauta de recepcion de l’arrièr dels vesitaires e un ensag entre los pals del pilar Julian Bosquet, mai las transformacions e una penalitat de Maloney sus la còrna per una victòria 31-16.
 
Dijòus, los Catalans aniràn rescontrar lor bèstia negra, Warrington qu’es vengut ganhar a Brutús e qu’a sortit los Dragons de la Cup ; unes Lops a las dents longas qu’an tanben d’enveja de montar al cap del classament.
 
 
Championship :Calendièr magrinèl per Tolosa
 
Doas novèlas equipas que venon pas a Tolosa : Halifax (lo 14 d’agost) e Batley (lo 28) ; aquelas partidas son tot simplament anulladas. Tolosa se desplaçarà a Oldham aqueste dimenge 22 e espèra… espèra… poder jogar enfins una partida a domicili contra York lo 11 de setembre, abans d’encadenar sus las fasas finalas.
 
Dins la setmana, confirmacion es estada balhada que lo darrièr de Super-Liga davalariá en Championship (Leigh i escaparà pas) e que lo campion de Championship montariá dins una competicion mantenguda a 12 clubs l’an que ven abans una modificacion del format.
 
 
Cup : La finala de 2022 a Tottenham
 
La RFL a volgut avançar las datas del debanament de la Cup. Wembley serà pas disponible per la data prevista de la finala : lo dissabte 28 de mai. Aquesta se debanarà doncas, per 2022, dins l’estadi de  63 000 plaças de Tottenham.
 
 
NRL : Los caps encadenan las victòrias
 
Los primièrs del classament NRL contunhan de ganhar: Melborna domina Canberrà 26-16; Penrith surclassa Sant-Jòrdi 34-16; Los Lapinons marcan sièis ensags als Titans (36-6). Los Polets, las Anguialas e Manly se quaificaràn tanben per las pelhòfas. A tres jornadas de la fin de la fasa de classament, demòran 2 plaças a prene e 7 candidats : Newcastle (22 punts); Titans e Canberrà (20 punts); Lamias, Dragons, Warriors e Tigres (18 punts). 
 
 
Elèit-1 : Calendièr conegut
 
La Federacion ven de desvelar los calendièrs de la sason 2021-22 dels campionats d’Elèit-1 (amb 9 esquipas) e d’Elèit-2 (pola unica de 13 clubs).
La primièra jornada d’Elèit-1 es prevista per la dimenjada dels 16 e 17 d’octòbre : Albi-Tolosa, Avinhon-Carcassona, Lesinhan-St-Gaudenç, Limós-Dragonets. Vilanòva esperarà una setmana de mai per entamenar la competicion. Son previstes dos dimenges de pausa debuta de novembre dins l’esper de rescontres internacionals e trèva per Nadal e cap d’an. La finala se debanarà a la tota fin de mai.
 
Per l’Elèit-2, debuta de la competicion tre los 18 e 19 de setembre.
 
 
 
 
 
Alan Roch