Una serada d’omenatge a Robèrt Martí, dich Padena, se tendrà deman dijòus 19 d’agost, dins la cort de l’Ostal Bodon a Crespinh (Segalar Roergàs). Robèrt Martí, a l’encòp poèta, escrivan, cercaire, professor, militant de la lenga e de la cultura d’òc, fondador de l’Ostal Bodon, creator e interprèt de Padena… nos quitèt al mes de mai. Sos amics li rendràn omenatge dins aquela serada de tria amb la participacion de fòrça artistas e amics dont Mirèlha Braç, Claudi Alranq, Florant Mercadièr, Eric Fraj, Alan Roch, etc.
 
Lecturas, cants, projeccions, represas de “padenadas”… vos espèran per aquel omenatge que començarà a nòu oras un quart del ser. Mas podètz venir tre sèt oras e mièja: auretz a disposcion de pichonas taulas per manjar un bocin en esperant la nuèch. Lo pan, lo vin e lo chuc de frucha son ofèrts e traparetz una pichona especiariá de produches locals ont vos aprovisionar a un prètz rasonable. La participacion als còstes es daissada a l’iniciativa de caduna e de cadun. Los artistas venon benevòlament : la recèpta serà transmesa a l’Institut d’Estudis Occitans per l’edicion d’un libre omenatge a Robèrt Martí.
 
La serada se tendrà defòra e caldrà respectar, de segur, las règlas sanitàrias. Per mai d’entresenhas, podètz telefonar al +33(0)5 65 42 16 53.


AR