Cada estiu es una tradicion que se’n poiriam passar. Lo bruch dei serenas de pompiers. L’autor jusieu iranian Serge Rezvani parla de la menaça dau fuec dins lei Mauras dins son òbra Divagation sentimentale dans les Maures (París: Hachette. 1979. p. 113) e d’alhors son ostau a la Gàrdia Frainet, “La Béate”, siguèt destruch dins un fuec de forèst a l’entorn de 2000.

Aquest an, lo fuec es partit pròche l’arrèst d’autoestrada que va de Tolon a Menton, l’arrèst de Sigas dins la comuna deis ais que vòlan, Gonfaron, probable d’una rèsta de cigarreta mau amorçada, encara que se parle de fòrça desparts de fuec. Es partit en direccion dau sud-èst. E aquest còp es pas un ai qu’a ben volat, es un incendi grandaràs. 
 
Batejat “l’incendi de Gonfaron”, a ja cremat mai de 6300 ectaras e fach dos mòrts dins lo departament de Var. Es lo mai gròs dei darrierei dètz annadas dins lo departament. En rapòrt deis Aups Maritims, representa l’equivalent de mai de 17 ans de fuecs.
 
Mai d’un milier de pompiers luchan encara còntra l’incendi que se declarèt diluns passat e qu’es totjorn pas mestrejat.
 
Se sente lo rimat despuei l’aglomeracion de Frejús-Sant Rafèu, çò rapòrta Nice-Matin.
 
A l’oèst, evitèt la comuna dei Maions, s’arrestèt dins lo massís dei Mauras, fach de garrigas, de suvieras e roredas, sus lo camin de Colobrieras, au quartier de Jaumet, Plan de Suviera sus la comuna de la Mòla, pròche la chartroa de la Verna (just avans l’ancian masatge harki de Capeluda). Una estèla de pompier mòrt après lo masatge de l’Amirautat sus lo camin de Colobrieras ramenta qu’es una zòna que crèma pas per lo promier còp. 
 
Au sud cremèt ai pòrtas dau masatge de la Galina a Cogolin, cremèt lo campatge de Carlesmagne dins lei escarts grimaudèus sus lo camin de Colobrieras (de l’escaisnom dau pairegand dau proprietari), e per lo mai au sud, traversèt l’RN 98 entre Cogolin e lei Manhans limitat per lo riu de Giscla. Un molon de campatges son estats evacuats, lei comunas an dubèrt de luecs d’abric e de toristas an dormit sus lei plajas per se parar dau malan. 
 
Mas per malastre, dimècres, i aguèt una represa dau fuec e un cambiament de vent que passèt a l’èst, totjorn dins lei Mauras entre la Gàrdia Frainet e lo Plan de la Torre. Es un endrech que leis còlas son de còps ‘arnadas’, vista la pression immobiliària, e doncas es aquela categoria d’ostaus que perilhan mai perque son environats d’aubres. E lo vent fai sautar lei flamas sus lei teulissas. 
 
D’images mòstran de bastidas, sovent nòvas, cremadas per la teulissa. Lei muralhas drechas. Lei conseus rèstan pariers: aigar la teulissa per evitar la pujada de temperatura e lo risc d’incendi; laissar un espaci vuege entre son ostau e la forèst e sortir de l’imatge pagnolesc de l’ostau encenchat per de vegetacion. 
 
E mai la DDE desbrosse regularament leis abòrds dei camins publics, empacha pas aquela situacion. 
 
Un cogolinenc testimònia de son biais, amb l’accent occitan, coma tenguèt l’ostau dei flamas, e si lanha dau manca d’entreten amb la pèrda de sauprefaires ruraus dau país


 
Doas personas son mòrtas, una dins son ostau sus la comuna de Grimaud dins lo golf Sambracitan. Un grand nombre d’esquipaments son presents sus lo terren e dins l’aire. Se parla de mai de 900 pompiers e 120 gendarmas sus lo terren. 
 
De pompiers son estats incomodats. Per ara, d’estradas son totjorn barradas a la circulacion, onte lei pompiers intervenon, coma o mòstra la mapa.
 
 
Dins lo Comtat Venaicin
 
Dins lo Comtat Venaicin, a Bauma de Venisa, lo Barrós, Sant Ipolite lo Graveiron e Caromb, de dimars a dimècres lo mistrau prenguèt de fòrça. Lo fuec a roigat mai de 250 ectaras. Son apiejats per de canadairs, entre tant. Quasi 120 pompiers èran mobilizats dins la nuèch de dimècres a dijòus en renfòrç. Son venguts subretot de Gard e dau Puei Domat e un pauc dei Bocas de Ròse. 7 pompièrs son estats leugierament nafrats, an agut lo “còp de caud”. L’incendi sembla ‘fixat’, coma es lo tèrme de mòda, valent a dire blocat dins sa progression, çò rapòrta France Bleu.
 
Tres estradas departamentalas encara son barradas a la circulacion. 
 

 
 
En Narbonés
 
E jamai dos sensa tres, dins lo Bas Lengadòc, en Narbonés, a Bisanet dins lo massís de Fònt Freja, un important incendi se declarèt dins la nuech de diluns a dimars. 60 ectaras de vegetacion an ja cremat. 400 pompiers son mobilizats per fixar l’incendi, cinc d’entre elei son estats nafrats, dont un grèvament.
 

 
Totjorn en cauva, lei fòrtei calors que rendon aisits leis incendis. Amb lo cambiament climatic ja a l’òbra amb l’estiu devengut bruscament e extrèmament caud, amb secaressa e vent fòrt, es pas previst que s’arrèste. Occitània serà lo territòri que serà tocat promier per lei consequéncias d’aquela revolucion climatica. Coma cambiar net nòstre relacion amb la Tèrra? O fau faire pasmens se nos volèm adaptar e subreviure. 
 
 
 
 
Laurenç Revèst