Comença uèi a Pau lo festenal Hestiv’Òc. Fins a dimenge venent, la musica, la dança, los espòrts, lo cinèma, lo teatre, las tradicions, los jòcs, la literatura, lo cant e las danças tornaràn èsser los protagonistas de la capitala bearnesa pendent tres jorns. Aquel festenal es un rendètz-vos cultural occitanista obligatòri de cada estiu, e es organizat per l’associacion Accents del Sud.
 
Se la programacion d’ongan es evidentament adaptada a las mesuras anticovid-19, la programacion es pasmens a la nautor de las autras edicions, malgrat qu’ongan se tenga pas l’impressionanta cantèra inaugurala. Ça que la, Pau serà fins a dimenge lo caireforc de las culturas occitanas: d’efièch, la 17a edicion del festenal Hestiv’òc ten mai de 200 artistas grops e companhiás vengudas dels quatre cantons d’Occitània e d’endacòm mai.
 
Hestivòc nasquèt en 2005 a partir de l’iniciativa volontària d’Accents del Sud. Aquesta organizacion culturala a un vintenat de personas benevòlas qu’arriban d’èsser 80 pendent los jorns del festenal. La division dels obratges en còlas de trabalh es la clau del succès de l’associacion. Cal cercar l’origina del Hestiv’Òc en l’an 2003, quand dos sòcis fondadors constatèron lo succès del Festenal Interceltic de la vila bretona d’An Oriant. Dich e fach. Un an puèi, creèron, amb d'autras personas motivadas, l’associacion Accents del Sud amb la tòca d’impulsar un festenal cultural, que vegèt ansin lo jorn en 2005.
 
Podètz trobar tota l’informacion e lo programa del festenal aicí, sul sit web del Hestiv’Òc, e mai, malaürosament, siá sonque en version francesa.