De cercaires de l’INP de Tolosa an transformat d’ancians avions de linha en de bombardièrs d’aiga e de produches retardadors del fuòc per amortar los incendis, una idèa indispensabla après l’èrsa d’incendis grèus qu’avèm patit al país coma tanben en Cabilia, Grècia, Turquia, Catalonha, Califòrnia e endacòm mai.
 
“L’actualitat mòstra qu’aviam rason tre 2012”, çò ditz a France Bleu David Joubert, un pilòt de linha e cofondador de Kepplair Evolution, la societat que pòrta lo projècte. L’idèa li passèt pel cap mentre que pilotava un avion de linha. Sul pic, Joubert se virèt devèrs la còla de Dominique Legendre, professor a l’INP de Tolosa e especialista de la mecanica dels fluids. Lo resultat es un sistèma que permet de largar 70 m³ d’aiga e de produches que retardan o amòrtan lo fuòc.
 
L’idèa de Kepplair Evolution es de metre aqueles avions al servici de l’Union Europèa dins l’estructura “RescEU” ont los estats membres meton de mejans en comun per luchar contra lo fuòc. Compte tengut dels incendis d’aqueste estiu, sembla una urgéncia. “Après una tala annada, esperam que los investisdors potencials prendràn consciéncia qu’es urgent de pèrdre pas de temps”, çò ditz Joubert.
 
En mai d’aquò, lo prètzfach de Kepplair Evolution permet de donar una segonda vida als ancians avions de linha destinats a èsser destruches.
 
 
 
 

Avec le réservoir Kios, d'anciens avions de ligne pourront larguer de plus grandes quantités d'eau et de produits rétardateurs de feu pour lutter contres les #incendies. La solution de @KepplairE a été pensée par des chercheurs de @toulouseinphttps://t.co/r8oeCjv4xY

— France Bleu Occitanie (@bleuoccitanie) August 19, 2021