Nos a quitats Charlie Watts, bateire dels Rolling Stones, çò confirmèt dimars lo mitic grop de rock. “Charlie èra un grand marit, paire, pepin e tanben, coma membre dels Rolling Stones, un dels melhors bateires de sa generacion”, çò ditz lo comunicat de la banda.
 
Watts aviá pas previst de participar a la virada dels Stones que començava per mièg setembre, perque se remetiá de l’operacion d’un càncer. En 2004, l’avián ja tractat d’un càncer de la garganta.
 
Afogat del jazz, aprenguèt de tocar la batariá en escotant d’artistas coma Sid Catlett e Max Roxach. Dins los ans 1960 èra ja un musician reconegut a Londres. Joguèt la batariá dins qualques grops, dont Blues Incorporated, qu’integrava qualques musicians de tria coma Alexis Korner e Jack Bruce. Sens abandonar jamai los Rolling Stones, collaborèt sovent a la banda de son collèga Bill Wyman.