La cooperativa sociala Il Quadrifoglio (Lo Treule de Quatre Fuèlhas) de Pineròl (Pinerolés) anoncièt al començament d’agost lo barrament de la residéncia espitalièra Monteserrat del Borg Sant Dalmatz (Val Ges). Aquela decision se produtz en consequéncia de las pèrdas de la societat a causa de la pandemia de la covid-19. Lo barrament, anonciat pel 31 d’agost, a estonat las institucions localas e los sindicats que son pas estats consultats. Pels residents es estada una docha freja.
 
L’estructura aguèt un ròtle important coma espital de longa durada de las vals Vermenhana, Ges e Estura. L’installacion, de 60 lièches, foguèt abandonada pels darrièrs pacients lo 20 d’agost en tot barrar efectivament unes dètz jorns abans çò qu’èra previst.
 
Lo barrament del centre sanitari a daissat 27 salariats al caumatge. Lo personal sanitari deu èsser reafectat dins d’autras estructuras de la cooperativa del temps que lo personal non sanitari, coma los cosinièrs, an una situacion fòrça mai complicada.
 
L’istòria passariá gaireben per malha, franc d’un comunicat de premsa de l’Assemblada Occitana de las Valadas e d’una letra dobèrta de la deputada del Partit Democrata Chiara Gribaudo. Dins los dos cases se demanda l’intervencion de las institucions. Considèran que lo barrament de la clinica es un grèu prejudici e que mòstra cossí la privatizacion dels servicis de santat es un sistèma falhit, mai que mai dins de zònas perifericas coma las Valadas.
 
Aquestes darrièrs jorns, en seguida de l’interès de la region Piemont, an redobèrt l’estructura per aculhir 32 refugiats afgans.
 
 
 
 
Mattia Pepino/Redaccion