Los 26 e 27 novembre de 2021, de doctorands e joves cercaires prepausan doas jornadas d’estudis per escambiar sus los tèmas de l’oralitat e de las transmissions de l’occitan e de las lengas romanicas minorizadas entre Alps e Pirenèus al sègle XXI. Prepausan d’interrogar las variacions lingüisticas contemporanèas a travèrs de lors realitats, lors emplecs e lors descripcions, e de pensar los apòrts e las possibilitats de las tecnologias numericas dins l’edicion, la difusion e la valorizacion dels còrpus orals collectats dins divèrses contèxtes. Per tal d’organizar aquestas jornadas, vaicí la crida a comunicacions.
 

A la debuta del sègle XXI, los cercaires e collectaires que trabalhan sus l’occitan e son oralitat (e tanben sus las lengas romanicas que l’occitan rescontra sus sos marges, entre Alps e Pirenèus: arpitan, catalan, aragonés, oïlic, piemontés e ligur) afrontan una problematica dobla, ligada a la mòrt venenta, pretenduda e interminabla, de la lenga.
 
D’un caire, son confrontats als empaches practics e metodologics de l’enquista (quand es possibla) aital coma a las variacions dialectalas constitutivas de la lenga orala. Lo besonh de reculhir e entreténer una paraula liura e espontanèa, rebat de l’estat lingüistic autentic, e la necessitat pels collectaires d’utilizar una forma de lenga mai normativizada (que contribuisson a difusar e, de còps, a elaborar) los menan a efectuar de longa d’ajustaments sus la lenga qu’emplegan pendent lors entretens. Fan un anar e venir entre las diferentas varietats diatopicas que rescontran mas tanben entre una practica dialectala naturala e un occitan mai “larg” (segon la formulacion de Patric Sauzet) qu’es pas en plen reconegut, o qu’es subreevaluat (socialament) pels locutors naturals. Alavetz, se pausa las questions ligadas a la gestion de la dimension diastratica dins l’enquista aital coma las del recors a de referéncias etnologicas necessàrias al manten d’una discussion.
 
D’autre caire, los cercaires-collectaires se tròban paradoxalament acarats a una manca de ressorsas oralas (que pertòca la recèrca, mas tanben las iniciativas didacticas) mentre que fòrça enregistraments son estats faches (per d’universitaris, de contaires, d’estudiants, d’associacions…) dempuèi la democratizacion de las tecnologias d’enregistrament audiovisual. Aquela manca es pas novèla, mas ven de mai en mai pregnanta compte tengut de l’estat critic de la comunautat lingüistica.
 
Es per aquò qu’aquestas jornadas d’estudis prepausan d’interrogar las variacions lingüisticas contemporanèas a travèrs de lors realitats, lors emplecs e lors descripcions, e de pensar los apòrts e las possibilitats de las tecnologias numericas dins l’edicion, la difusion e la valorizacion dels còrpus orals collectats dins divèrses contèxtes.
 
Doas taulas redondas seràn organizadas, a la fin de cada jornada, per escambiar sus la mesa en plaça concreta de modalitats d’edicion e de difusion en foncion de las practicas, dels estudis e/o dels publics esperats.

   

Per respondre a la crida, cal presentar un resumit de l’intervencion (aperaquí 300 mots), d’elements bibliografics e una presentacion personala son esperats, lo tot mandat a l’adreiça: occitan.cr@gmail....
 
Las comunicacions seràn seguidas d’una publicacion dels actes sul portal Numerev. Per mai d’entresenhas, podètz escriure a Quentin Garnier (quentin.g.garnier@gmail...) o Alice Champollion (alice.champo@gmail...).
 
Comitat scientific: Hervé Lieutard, Elisabetta Carpitelli, Patrick Sauzet, Guylaine Brun-Trigaud, Quentin Garnier, Alice Traisnel, Quentin Peyras, Alice Champollion
 
Datas: 26 e 27 Novembre de 2021 Luòc: Universitat Pau Valèri Montpelhièr III, sit Sant Carles 1 (Carrièra del professor Henri Serre, Montpelhièr)
 
Coordinacion: Quentin Garnier (ReSO, UPV), Alice Champollion (ReSO, UPV), Christian Dorques (ReSO, UPV), Camille Delarue (ReSO, UPV).
 
 
 
 
Alice Champollion