La coalicion independentista basca Amaiur, Esquèrra Republicana de Catalonha (ÈRC) e lo Blòc Nacionalista Galèc (BNG) presentèron amassa, dijòus passat, al Congrès dels Deputats de l’estat espanhòl, una iniciativa “per l’autodeterminacion dels pòbles”. S’agís d’una propòsta de lei qu’enregistrèron al parlament espanhòl. “Las nacions existentas dins l’estat espanhòl an los meteisses dreches que quina autra comunautat que siá de l’encastre mondial”, çò afirmèron.

La proposicion de nòrma reconeis lo Bascoat, los Païses Catalans e Galícia coma de nacions e establís que, en cas de convocacion d’un referendum, aquel se considerarà valid se la participacion passa 50% del cens electoral. En cas que 50% dels vòtes sián favorables a l’independéncia, balhan al govèrn autonòm lo poder de proclamar aquela independéncia.
 
L’iniciativa es estada presentada pels pòrtavoses de las tres formacions, Xabier Mikel Errekondo, Alfred Bosch e Olaia Fernández. Bosch a remembrat que la proposicion revendica que totes los pòbles “ajan lo drech a l’autodeterminacion e [que] lo pòscan exercir”. Segon Bosch, s’agís d’una espròva envèrs la democracia espanhòla, mejançant una via “plenament democratica e legala”, reconeguda per la legislacion internacionala.
 
Lo tèxt qu’an presentat afirma que “la tòca d’aquela lei es de transpausar a l’ordenament juridic espanhòl lo drech a la liura determinacion de las nacions, reconegut per la legalitat internacionala e per l’estat espanhòl amb la ratificacion de divèrses tractats internacionals”, segon çò que se pòt  legir dins l’article 1 d’aquela propòsta de lei. A mai, expausa que l’objècte de la nòrma es de “regular l’exercici del drech de liura determinacion de las nacions que se tròban dins l’estat espanhòl”.
 
La lei reconeis que las nacions de l’Estat “an lo drech inalienable de convocar un referendum d’autodeterminacion nacionala sus la constitucion d’un estat independent”. Establís qu’auràn drech de vòte los ciutadans amb drech al sufragi a las eleccions municipalas e que la consulta se poirà convocar a l’iniciativa del parlament autonòm o de 20% del cens electoral.
 
La nòrma establís qu’un còp proclamada l’independéncia, “s’iniciarà la negociacion amb l’estat espanhòl per establir los dreches e los devers” de cada part “en un procès de transicion pel plen transferiment de poders e de ressorsas”. “En cas de discordanças qu’empachen lo procès de transicion, qui que siá de las doas parts poirà sollicitar la mediacion de las Nacions Unidas”, çò conclutz lo tèxt, que se presentarà al debat en session plenièra del Congrès dels Deputats espanhòl.