Aquí lo mes de setembre amb lo temps de las fasas finalas en NRL, Superliga e Championship. Al país, las esquipas an représ l’entraïnament. Per l’Elèit 2, la represa de la competicion se farà la dimenjada dels 18 e 19 de setembre.

Recrutament XXL al FC Lesinhan
 
Aprèp doas sasons als Dragons Catalans, lo dobertura australian James Maloney, que voliá demorar en Euròpa e arrestar lo mai naut nivèl, rejonh l’FC Lesinhan. Un jogaire de tria (241 partidas d’NRL) pel campionat: internacional, campion del Mond 2017, 2 campionats NRL, 14 partidas amb Nòva Galas del Sud (amb 2 tièras d’Estats d’Origina ganhadas: 2018 e 2019), 4 còps melhor realizaire NRL (2011, 2013, 2014, 2015), 3 còps melhor marcaire de punts NRL (2013, 2014, 2015), designat melhor mièg de dobertura NRL en 2016.
 
Aprèp aver portat las colors de Melbourne, NZ Warriors, Roosters, Cronulla, Penrith e Dragons, se vestirà doncas de verd e blanc per aquesta sason un còp la Superliga acabada.
 
Dins l’efectiu dels Molinièrs de Corbièras, tornarà trapar Laurenç Belmàs (contracte non renovelat cò dels Catalans) e Jason Baitieri (fin de carrièra als Dragons) qu’an ja signat dins l’estiu e que s’ajustan al pilar Sam Moa (segonda sason dins las Corbièras e que dintra de mai dins l’enquadrament tecnic), Antòni Maria, sens parlar del local Damian Cardace que foguèt Dragon fa qualques annadas.
 
L’FCL farà figura d’espavental dins una competicion que va veire montar son nivèl.
 
 
NRL: l’ala e la cuèissa pels Lapinons
 
Aprèp l’avantdarrièra jornada de la fasa de classament, se coneis sèt dels uèit qualificats per las pelhòfas.
 
Suspresa: la tièra de las 19 victòrias de tira del campion e cap de fila Melbourne s’arrestèt dissabte sus sa pelena fàcia a Parramatta: 10-22.
 
Divendres, lo dèrbi bèl de Sydney, jogat a Brisbane (vist que tota la competicion, finala compresa, se debana dins los estadis de Queensland), vegèt los Lapinons faire plan de misèrias als Polets qu’encaissèron un 54-12. La tension èra granda e la saca de carpans s’entredobriguèt mai d’un còp en fin de partida.
 
En batent los Dògols 36-18, Manly pren una brava opcion per la quatrena plaça e la qualificacion dins lo naut del tablèu.
 
Demòra en balança la ueitena plaça, ocupada per ara per Cronulla (22 punts, -24) que demòra jos la menaça de Canberra (22 punts, -73) e, matematicament, dels Titans (20 punts, -47). Pel compte de la darrièra jornada, Canberra reçaup los Polets dijòus; Cronulla afronta Melbourne divendres e los Titans saupràn dimenge de matin se pòdon aténher o non la qualificacion quand jogaràn contra los neozelandeses.
 
 
Superliga: los Dragons jogaràn la mièja finala a domicili
 
Aquestes dissabte e dimenge, l’estadi de Newcastle serà l’encastre de la Dimenjada Magica amb en cap d’aficha l’afrontament entre los primièrs dos: los Dragons Catalans e St Helens (dissabte, a 18h15; partida retransmesa per BeInSport).
 
En esperant lo rendètz-vos, los catalans anèron ganhar 42-14 dijòus de ser a Salford abans de reçaupre los Centurions de Leigh diluns. Dominèron aisidament una formacion promesa dempuèi bèl brieu al retorn en Championship: 64-0.
 
L’entraïnaire a qualques mals de cap per compausar la formacion, que las nafraduras son nombrosas amb lo ritme vertadièrament infernal de la competicion.
 
Bona novèla: la victòria de St Helens a Warrington 24-14 condemna los Lops a la tresena plaça e valida atal la recepcion a Brutus pels catalans pel compte de la mièja finala de la Superliga a la debuta d’octòbre.
 
 
 
 
Alan Roch