Demòra un estadi ont los Dracs an pas encara ganhat: aquel de Leeds. E divendres al ser, l’equipa campiona de la Super-Liga e campiona del monde dels clubs esperava los Dracs. L’impact fisic dels Rinoceròsses e lo jòc al pè del menaire Sinfield agèron rason de la bona volontat catalana: 34 a 18. Los Dracs recebon dissabte a Brutus la formacion de League One, las Aglas de Sheffield, pel compte dels 1/8en de finala de la Cup abans la venguda en tèrra catalana del cap-de-fila de la Super-Liga Huddersfield lo dissabte 5 de mai.

 

En Elita, la fasa de classament s‘acabèt aquesta dimenjada. Dissabte, Limós pausèt quauqes problèmas al Tolosa Olimpic mas la formacion mondina l‘emportèt 28-12. 

 

Dimenge, Pià foguèt sens pietat per confirmar sa primièra plaça del costat de Montpelhièr : 54-16.

 

Lescura d’Albigés demorarà amb lo comptador blocat a una soleta victòria per sa primièra sason en Elita: darrièra partida perduda sus lor pelena fàcia a Vilanòva d’Òlt : 34-24. Anirà melhor l’an que ven!

 

A Sant Estève, los Dragonets se mostrèron mai entreprenents que los canaris de Carcassona; amb mai de nhaca e de vitessa e una melhora circulacion de la pauma, ganhèron 36-14.

 

Lo classament s’establís atal e mòstra que lo grop dels 6 qualificats èra larjament al-dessús mas a calgut aver recors a la diferéncia dels punts per establir unas posicions:

 

1) Pià, 46 punts;

2) Carcassona, 44 punts;

3) Avinhon, 44 punts;

4) Lesinhan, 42 punts;

5) Tolosa, 42 punts;

6) Dragonets, 40 punts;

7) Vilanòva, 32 punts;

8) Limós , 28 punts;

9) Montpelhièr, 20 punts;

10) Lescura, 18 punts;

 

Pià e Carcassona son dirèctament qualificats per las mièja-finalas que se jogaràn totas doas en seguida lo dissabte 5 de mai sus l’estadi dels Minimes a Tolosa. En barratge, aquesta dimenjada, Avinhon reçauprà Sant Estève-XIII Catalan e Lesinhan esperarà Tolosa al Molin. 

 

Anem, l’ora es venguda: de pertot, los afogats dels qualificats preparan las afichas, la còrnas, las plancardas, las caravanas, las bandièras per seguir las euipas dins las fasas finalas.

Alan Ròch

 

-----

* pelhòfas : adaptacion occitana del tèrme anglés : play-off. E es vertat qu’en fasa finala e eliminatòria, se la val mai crebar la pelhòfa per ganhar!