Lo celèbre compositor grèc Mikis Theodorakis defuntèt ièr dijòus a 96 ans. Sa trajectòria coma compositor mas tanben coma artista engatjat per la democracia e los combats politics e socials, es marcada inevitablament per èsser estat l’autor de la musica del filme Zorba lo Grèc (1964). Un dels vidèos mai populars de Theodorakis es lo de 1995, dins un concèrt a Munic, ont parteja l’empont amb Anthony Quinn, l’actor que jòga lo protagonista del filme.
 
Totun, delà lo filme, sa trajectòria es impressionanta, amb mai d’un milièr de composicions, dont la Trilogia de Mauthausen, considerada coma lo trabalh musical pus bèl jamai fach sus la Shoah.
 
Sas cançons foguèron enebidas pendent los ans de la dictatura, entre 1967 e 1974, quand un conselh militar governèt lo país. Foguèt perseguit, torturat, enterrat viu e exiliat. Son engatjament politic, restacat al Partit Comunista Grèc, lo faguèt deputat entre 1981 e 1990, malgrat que puèi foguèsse elegit coma independent pel partit Nòva Democracia. Pendent dos ans foguèt ministre del govèrn de Konstandinos Misotakis e se batèt per melhorar las relacions entre Grècia e Turquia. A mai, foguèt un activista contra la violéncia e contra la guèrra, amb un engatjament fòrça marcat contra l’invasion d’Iraq en 2003.