Emmanuel Macron presentèt ièr a Marselha lo plan d’urgéncia que l’estat francés destina a la vila mai granda d’Occitània. Lo discors lo faguèt dins una mesa en scèna plan sonhada al palais del Faròt, e mai una tempèsta sobda interrompèsse lo parladís que lo fasiá lo president francés davant d’entrepreneires, d’elegits, d’artistas e d’enfants de l’escòla Sauvaigne, amb lo Pòrt Vielh darrièr el.
 
Lo plan presentat per Macron pertòca la seguretat, l'escòla, la crisi sanitària, la cultura e mai l'environament, e lo cap de l’estat a assegurat que se resumiriá pas a “un chèc o un plan”, en referéncia als nombroses plans promeses a la Ciutat Focèa qu’an pas produch de resultats reals.
 
Sus la seguretat, lo cap de l’estat francés a anonciat la creacion de 200 nòus pòstes de policièrs, doas companhiás permanentas de policièrs antisusmautas (CRS) e mai de 150 milions d’èuros per crear un nòu ostal de polícia. En mai d’aquò, se metriá en servici, segon el, 500 camèras de seguretat.
 
Quant a l’escòla, Macron a prepausat la creacion d’una “societat ad hoc que la presidirà lo cònsol màger e qu’aurà per mission de renovar las escòlas mai degalhadas”, e n’a promés “un finançament important”. A mai, s’es engatjat a metre en plaça un “capital jove creator” per sosténer amb “plusors milièrs d’èuros” los joves qu’aurián de projèctes o “d’idèas entrepreneiralas”.
 
A prepaus de la santat, lo president francés a afortit que s’investiriá 169 milions d’èuros “per, entre tant, la renovacion de l’espital de la Timona e de l’espital Nòrd”, e “50 milions d’èuros per la creacion d’un ostal de las femnas”.
 
Tocant la cultura, a dich que prevesiá la creacion d’una granda escòla de cinèma e de grandas infrastructuras pel rodatge de filmes e de sèrias.