La penúria de semiconductors, tanben diches microchips, inquieta l’economia mondiala. En febrièr passat, Renault e PSA deguèron arrestar lor produccion d’automobilas per manca d’aqueles compausants, un problèma que tanben lo patisson Seat, Stellantis, Ford, Volkswagen e Toyota.
 
Lo 63% de la produccion mondiala dels semiconductors se fa en Taiwan, segon CNBC; mai que mai en çò de la societat Taiwan Semiconductor Manufacturing Co (TSMC). Puèi, la sud-coreana Samsung produtz lo 18% dels semiconductors mondials e la chinesa SMIC lo 6%. Actualament, los microchips son al centre del combat geopolitic pus grand que i aja al Mond, e Euròpa, que n’aviá fabricats fòrça, se tròba ara sens defensa.
 
Actualament, las veituras contenon una centena d’aqueles compausants.E tanben ne pòrtan los telefòns intelligents, los ordenadors, los refregidors, las maquinas de lavar, los fretadents e quitament qualques menas d’ampolas. La pandemia a aduch de problèmas a la produccion dels semiconductors e, d’autre caire, a fach aumentar la demanda de produches que ne contenon. Segon los expèrts, aquela crisi se resolverà pas, almens, fins a l’an 2022, çò rapòrta RAC1.