Una start-up de Blaiés, al nòrd de Bordèu, presentarà lo 1r d’octòbre que ven a l’exposicion universala de Dubai una solucion pel transpòrt de grands objèctes coma las palas eolianas, de troncs d’arbres o de materials de construccion que de costuma se transpòrtan sus las estradas per mejan d’enòrmes artefactes mecanics. S’agís de Flying Whales, e justament la societat prepausa aquel transpòrt per mejan de balenas volantas, es a dire de zepelins.
 
Implantada a la Ruscada, Flying Whales presentarà lo 1r d’octòbre que ven al pabalhon de França lo zepelin de mèrças pus grand del Mond, de 200 mètres de long e 50 mètres de diamètre, que serà capable de transportar per aire fins a 60 tonas sus mai de 1 000 quilomètres. “Anam prepausar un dirigible capable de cargar e descargar en vòl estacionari, çò que permetrà de nos afranquir de las constrenchas d’infrastructuras. Aquò nos deuriá permetre de considerar d’autras aplicacions, per operar en cas de catastròfa naturala, o pendent de marèas negras per pulverizar de dispersants”, çò explica a 20 Minutes la directritz de marqueting de la start-up, Michèle Renaud.
 
Pasmens, per veire s’enaurar aquel immens dirigible, caldrà esperar un moment. La construccion de la primièra balena volanta començarà en fin d’annada o al començament de 2022 e lo primièr vòl es esperat per 2024.
 
La start-up prevei un mercat de 700 a 800 aparelhs. “Per ara, nòstre objectiu es cotat sus 152 aparelhs d’ací a 2032,  fabricats dins tres usinas, la de la Ruscada, puèi una autra en Quebèc e una en China”, çò precisa Renaud.