A la fin de la partida d’aqueste dissabte a Brutus, los Dragons Catalans recebèron lo Bloquièr (lo League Leader’s Shield) que marca lor primièra plaça al classament. Un signe bèl de la qualitat de la formacion, mas que demòra un trofèu onorific: l’important demòra de ganhar la finala de la Superliga, e de clubs qu’obtenguèron lo bloquièr (Castleford, Huddersfield, Warrington) ganhèron pas la finala (caça gardada dempuèi 1996 de Bradford -davalat en Championship -, Leeds, St Helens e Wigan). Desiram un sòrt melhor als catalans!

Superliga: los uèlhs virats cap al Teatre dels Sòmis[1]
 
Per la recepcion dels Gigants d’Huddersfield, l’entraïnaire dels catalans aviá decidit de daissar pausar los quadres de la formacion, levat los mièges Drinkwater-Maloney. La formacion rejovenida comencèt plan la partida en signant tres polits ensages (18-0). Los Gigants daissèron passar l’auratge, puèi profeitèron de las fendasclas dins la defensa catalana en manca d’automatismes per marcar cinc ensages e ganhar 30-18. Quina serà l’opcion de McNamara per la partida de jogar divendres a Wigan e que poiriá èsser una repeticion per la mièja finala del 30 de setembre?
 
En ganhant contra Castleford (26-19), Hull KR pren una opcion per la qualificacion.
 
La darrièra jornada serà importanta per l’atribucion de la cinquena e de la seisena plaças qualificativas entre Hull KR, Leeds e Castleford: una esquipa es de tròp! De mai, Leeds reçaup Hull KR alara que Warrington rend vesita a Castleford.
 
 
Championship: los tolosans cap a la Superliga
 
Tolosa se rapròcha de son objectiu: la montada en Superliga.
 
Lor i demòra una partida de jogar aqueste dissabte a Newcastle, puèi esperaràn de conéisser lor adversari per la mièja finala que se disputarà lo dissabte 2 d’octòbre dins (enfin) lor estadi Ernèst Wallon, a 16h15 precisas!
 
 
NRL: la Tempèsta e los Lapinons en mièja finala
 
Lo primièr torn de las pelhòfas a rendut son verdicte: los Titans e Newcastle (lo d’Austràlia!) an acabada la sason; la Tempèsta e los Lapinons son en mièja finala.
 
Dins lo naut del tablèu, Melbourne a aisidament dominat Manly 40-12, alara que los Lapinons capitavan de prene l’avantatge sus Penrith qu’èra favorit: 16-10.
 
Calguèt un tombat de Walker just dintrat per qualificar los Polets fàcia als Titans: 25-24. Las Anguialas marcan 5 ensages e baton Newcastle 28-20.
 
Las partidas qualificativas per las mièjas finalas opausaràn doncas Manly e Polets aqueste divendres, puèi Penrith e Parramatta aqueste dissabte.
 
 
L’adieu a Miquèl Maïque
 
Dins la nuèit de dissabte a dimenge, moriguèt a l’atge de 73 ans Miquèl Maïque, una legenda del XIII.
 
Mèstre d’escòla, vegèt passar a la Grassa tanplan los escolans locals coma los de la planeta amb lo centre de refugiats qu’èra dins la localitat. Malgrat sa bonomia, los pichons se tenián quiets fàcia a sa fòrta preséncia fisica de segonda-linha!
 
Defendèt las colors de l’FC Lesinhan amb qual daverèt una Copa de França e l’omerica finala del campionat 78 contra los catalans (3-0). Capitani de l’esquipa de França, menèt dos còps los Blaus a la victòria fàcia als australians (1978); foguèt tanben seleccionaire de la formacion tricolòra (1982-83).
 
Marcat al Partit Socialista e elegit a la comuna de Lesinhan, aprèp èsser estat adjunt als espòrts, devenguèt cònsol de 2009 a 2020 (e tanben president de la Comunautat de Comunas de la region de Lesinhan), mas sa lista perdèt de 9 voses las eleccions passadas. Aprèp l’incendi de julh de 2018, obrèt per la renovacion de las tribunas de l’estadi del Molin.
 
En 2000, signèt lo prefaci del libre publicat per l’IEO (coll. Descobèrtas): XIII coma rugbí. Escriguèt:
 
“Soi pas vengut al XIII. A Lesinhan, i nasquèri dedins. Faguèri un pauc coma Obelix e la topina de pocion magica. Lo rugbi es un biais de viure e aquel biais de viure se transmet e dura dins lo temps. Es fondamental per una comunautat: tot lo monde jòga pas o va pas a l’estadi, mas lo rugbi es una referéncia collectiva.”
 
Saludava lo XIII: marca d’identitat, espòrt educatiu, un esperit (morala, coesion, esperit d’esquipa,…), espòrt d’una comunautat, espòrt d’integracion, etc. Adieu, Miquèl!



Alan Roch