capçalera campanha

Actualitats

InternacionalPoliticaSocietat

Jutjan 13 independentistas catalans per “terrorisme”

Lo jutge instructor de l’afar assegura que los acusats an en comun “de principis ideologics favorables a l'independéncia e l’activisme radical per l'aténher”

Tèxte legit

Se debanarà a Madrid un procès contra los 13 activistas independentistas catalans que 9 d’eles los detenguèron dins la davalada de 2019 dins una operacion mediatica e espectaclosa nomenada “Operacion Judàs”. Coma son acusats de “terrorisme”, lo procès se ten a l’Audiéncia Nacionala espanhòla, un tribunal d’excepcion especializat en aquela sòrta de crimes e delictes. Nòu dels acusats son tanplan jutjats per téner e aver fabricat de substàncias perilhosas e espleches explosius “de caire terrorista”.
 
Al moment de las detencions foguèron acusats de far partida d’un grop armat que se seriá preparat per far d’atemptats e ocupar lo Parlament de Catalonha. Los mèdias espanhòls ne parlèron en fasent creire qu’avián trobat dins los ostals dels detenguts de produches per fabricar d’explosius, qu’en realitat èran de produches de netejatge abituals dins un ostal. Al moment de la detencion, lo quite president del govèrn espanhòl, Pedro Sánchez, exigiguèt publicament del president de la Generalitat Quim Torra que condemnèsse la violéncia e los terroristas.
 
Ara, lo jutge instructor de l’afar assegura que los acusats an en comun “de principis ideologics favorables a l'independéncia e l’activisme radical per l'aténher”. A mai, lo magistrat assolida que la tòca de las personas jutjadas èra “d’aténher l'independéncia de Catalonha, en emplegant la violéncia dins son expression pus granda, en forçant, de manièra coercitiva, las institucions de concedir per la via dels faches la separacion de Catalonha de la rèsta d’Espanha.”
 
Los avocats afortisson que l’instruccion es inconsistenta. Lo jorn de l’arrestacion, la Gàrdia Civila espanhòla pretendèt d’aver trobat “de substàncias susceptiblas d'èsser utilizadas per la fabricacion d’artefactes”. Mas, dins lo vidèo que lo difonguèt lo còrs de polícia, solament s’i vesiá d’objèctes coma una saca amb de serrilha e una ola. Puèi ni los especialistas de la recèrca d’explosius ni los cans trobèron pas res.
 
 

 
 

abonar los amics de Jornalet

 

 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

Franc Bardòu
2.

Ara, lo jutge instructor de l’afar assegura que los acusats an en comun “de principis ideologics favorables a l'independéncia e l’activisme radical per l'aténher”. Coma, per exemple, d'organizar un referedum democratic ?

  • 0
  • 0
Eric
1.

Malurosament tot pretèxte es bon per decridibilizar la causa...

  • 5
  • 0

Escriu un comentari sus aqueste article